Туймаада ыһыаҕар Турция бэрэсидьиэнэ Реджеп Эрдоган уола, Этноспорт аан дойдутааҕы конфедерациятын бэрэсидьиэнэ Неджметтин Эрдоган Билал кэлиэҕэ. Кини Дьокуускайга бэс ыйын 28-30 күннэригэр кэлэрэ былааннанар.
edersaas.ru
Кини Саха сиригэр кэлиэҕин уруккуттан баҕарар эбит. Былырыын мас-рестлинг аан дойдутааҕы чөмпүйэнээтин көрө кэлиэн баҕарбыт да, сатамматах. Онон ыһыахха кэлэн, спорт национальнай көрүҥнэрин илэ хараҕынан көрөргө бэлэмин биллэрбит.
Турция дэлэгээссийэтэ Манчаары аатынан Спорт национальнай көрүҥнэрин киинигэр, спортивнай эбийиэктэргэ уонна Туймаада ыһыаҕар сылдьыахтара. Кинилэр саха норуотун үгэстэрин уонна спорт көрүҥнэрин билсэ-көрө кэлэр сыаллаахтар. Ыһыахха “Дыгын оонньууларын” уонна “Өбүгэлэр оонньууларын” көрүөхтэрэ.
Билал Эрдоган мас тардыһыытын олус интэриэһиргиир эбит. Оннооҕор Этноспорт норуоттар икки ардыларынааҕы форумнарыгар мас тардыһан көрбүт.
Ыспыраапка
Конфедерация 2015 сыллаахха Бишкеккэ тэриллибит уонна кэлин Стамбулга көспүт. Тыһыынчанан сылларга көлүөнэттэн көлүөнэҕэ бэриллэн испит түҥ былыргы спорт көрүҥнэрин сөргүтэр, өйүүр, кэҥэтэр, сайыннарар сыаллаах.
Ангелина ВАСИЛЬЕВА, “Саха сирэ” хаһыат, edersaas.ru