Бу кыһын Уус Алдан Тулунатыгар борооску таһырдьа кыстаан, дьиэ сүөһүтүгэр сыһыаннаах өтөрүнэн буолбатах түбэлтэ тахсыбытын туһунан суруналыыс Иван Ксенофонтов суруйуутун үгүс киһи сэргии, соһуйа аахпыта. Оттон бүгүн социальнай ситимнэргэ тулуналар «дьикти» оҕустарын сүүскэ биэрэр санаалаахтарын туһунан сурах тарҕанна.
edersaas.ru
Былырыын Дьяконовтар биир борооскулара хотоҥҥо кыстаабакка, таһырдьа хоно сылдьан кыһыны туораабыта. Хара күһүҥҥэттэн саҕалаан дьонноро хотоҥҥо киллэрэ сатаабыттара даҕаны, кыайтарбатаҕа. Киһи сөҕүөн иһин, сүөһүлэрин уулаталларыгар, ийэтин кытта барсан ойбонтон уулаһан кэлэр эбитэ үһү.
«Дьикти» сүөһүлэрэ быйыл хотоҥҥо киирдэ дуо диэн Дьяконовтартан ыйыталаспыппар, Аграфена Ксенофонтовна:
– Бу күһүн хотоҥҥо киллэрээри эмиэ эрэй бөҕөнү көрдүбүт. Олох киирбэт. Дьэ, дьикти. Иккис сылын таһырдьа кыстыыр былааннаах быһыылаах. Өлөрүөхпүтүн эмиэ баҕарабыт. Ол эрээри туттарбат. Куота сылдьар. Бэйэбит да аһынабыт. Хайдах буолуохпутун билбэппит. Саатар оппут олох суох, – диэн төлөпүөнүнэн кэпсээтэ.
Быйыл от үчүгэйдик үүммэккэ, сүөһүлээх ыаллар үгүс ыарахаттары көрүстүлэр. «Орто дойду» зоопарка үлэһиттэрин кытары сибээскэ тахса сырыттыбыт. Дьикти оҕус быйыл эмиэ таһырдьа кыстаатаҕына, Гиннес рекордугар да киириэ этэ. Биитэр ким эбит отунан көмөлөһөрө буоллар», — диэн Тулуна олохтоохторо этэллэр.
Анивера АКИМОВА, «Саха сирэ» хаһыат, edersaas.ru