Бэҕэһээ, ыам ыйын 27 күнүгэр, Дьокуускай куорат баһылыга Сардаана Авксентьева «Туймаада- 2020» ыһыаҕы бэлэмнээһиҥҥэ уонна ыытыыга тэрийэр кэмитиэт мунньаҕын ыытта.
edersaas.ru
Онлайн-ыһыах бырагырааматын кытта Дьокуускай куорат култуурураҕа уонна духуобунай сайдыыга салалтатын салайааччыта Индира Ли билиһиннэрдэ.
Бэс ыйын 21 күнүгэр, Үс Хатыҥҥа Кымыс киинигэр алгыс сиэрэ-туома ыытыллыаҕа. Алгыһы үс кутуруксуттаах алгысчыттар ыытыахтара (социальнай дистанцияны тутуһан туран), сиэр-туом оҥоруутун НВК “Саха” тэлэбидиэнньэ быһа биэриигэ көрдөрүөҕэ.
Куорат култууратын салалтата этэринэн, бэс ыйын 8-21 күннэригэр ыһыахха анаммыт 75 тэрээһин барыаҕа. Ол курдук, тэлэбиисэринэн, социальнай ситимнэргэ,www.cultura14.ru, Ykt.ru саайтарга учуонайдар ыһыах туһунан кэпсиэхтэрэ, эстрада сулустарын кэнсиэрдэрэ көстүөхтэрэ, виртуальнай күрэстэр, быыстапкалар ыытыллыахтара. Куорат олохтоохторо саха аһын астыырга, саха таҥаһын тигэргэ маастар-кылаастарга кыттыахтара, саха төрүт оонньуларыгар күрэхтэһиэхтэрэ. Бырааһынньыктааҕы кэнсиэр саҥа нүөмэрдэри кытта урут уһуллубут роликтартан таҥыллыаҕа.
Куорат баһылыга Сардаана Авксентьева саастаах дьону бырааһынньык тэрээһиннэригэр кытыннара сатыырга ыҥырда: “Өбүгэлэрбит саҕаттан, ыһыах уһун кыһыны туораан күөххэ үктэммиппитигэр аналлаах өрөгөйдөөһүн бырааһынньыга. Ыһыаҕы кырдьаҕас дьон олус күүтэллэр, ахталлар. 75-ттэн үөһээ саастаах ытык кырдьаҕастарбыт Аҕа дойду улуу сэриитин оҕолоро буолаллар. Кинилэр санааларын көтөҕөр, үөрдэр сыалтан, куорат дьаһалтата хас биирдиилэригэр сэмэй бэлэх туттарыаҕа”. Бу бэлэх чыынтан, өҥөттөн тутулуктаммакка, бука барыларыгар туттарылларын кини чуолкайдаан эттэ. Билигин куорат муниципальнай уокуругар 75 сааһын туолбут 8,5 тыһыынча киһи олорор. Бэлэххэ ыһыах аһа, ыраастаныы сиэригэр-туомугар туттуллар оттор, чэй уонна да атын баар буолуоҕа.
Егор Карпов, «Саха сирэ» хаһыат, edersaas.ru
Хаартыска https://якутск.рф