Томпо улууһун биир бөдөҥ нэһилиэгэр, Байаҕантайга, 1 тыһ. 760 ынах сүөһү, ол иһигэр 516 ыанар ынах итиэннэ 983 сылгы, ол иһигэр 383 биэ баар. Нэһилиэк олохтоохторо 3 тыһ. туонна оту бэлэмниир былааннаахтарыттан 2 тыһ. 465 туоннаны кэбиспиттэр. edersaas.ru
Николай Тополин аймахтарын түмэн төрүттэрэ олохсуйан олорбут дойдуларыгар, Кириэс Халдьаайы бөһүөлэгин утары, Алдан өрүс уҥуор, уруккута “Хаадьыма” холкуос сиригэр “Хаадьыма” бааһынай хаһаайыстыбатын тэринэн үлэлии-хамсыы сылдьар. Барыта сүүс ынах сүөһүлээх, 148 сылгылаах, кыстыгы көрсө 160 туоннаны оттуур сорудахтаах. Билиҥҥи туругунан хаһаайыстыба отчуттара 110 туоннаны оту чөкөппүттэр. Күн-дьыл эрэ туран биэрдэр, кыстыыр отторун хааччынар санаалаахтар.
Ходуһаҕа сэттэ киһи сылдьар. Икки киһи тиэхиньикэнэн үлэлиир, биир “Бөлөрүүһүнэн” оҕустараллар, иккис тыраахтарынан мустараллар итиэннэ үс сыллааҕыта Тааттаттан атыыласпыт тэриллэринэн түрбэлии суулаан иһэллэр. Оттон куһаҕан, ол эбэтэр уулаах, дулҕалаах сиргэ түөрт киһи илиилэринэн оттууллар.
Биир биригээдэ хотон тутуутугар үлэлиир. Урут туттубут сүүс ынах турар кыстык хотонун кэҥэтэннэр, сүүрбэ миэтэрэ усталаах, аҕыс миэтэрэ кэтиттээх хотону тута сылдьаллар. Оттон сылгыга Николай быраата Александр Тополин туспа хаһаайыстыба тэринэн, сылгы базатын тутуутугар көрүллүбүт 1 мөл. солк. суумалаах граны ылан, саҥа база оҥосто сылдьар. Билиҥҥитэ биир дьоҕус дьиэни уонна баанньыгы туппут. Ити курдук, тыа сирин үлэһит дьонугар күн былдьаһык.
Томпоттон Евдокия Неустроева, edersaas.ru сайтка анаан.