Тойуктаах 6-с устуудьуйа
· - ЭС - маны аах

Тойуктаах 6-с устуудьуйа

Москваҕа М.С.Щепкин аатынан Үрдүкү театральнай училищеҕа быйыл 6-с саха устуудьуйата аһыллар диэн, үөрэххэ ылыы эрдэттэн биллэриллэн, өрөспүүбүлүкэ араас улуустарыттан талааннаах, артыыс буолар баҕалаах ыччаттар ааспыт сайын хайдах курдук хас эмэ түһүмэхтээх тургутууну ааһан, дойду киин куоратыгар артыыс үөрэҕэр барбыттарын туһунан биһиги сиһилии кэпсээбиппит.

edersaas.ru

Ыраахтан олорон үөрэнэллэр

 Билигин, аан дойдуну коронавирус эпидемията аймаан, Москваҕа эмиэ балаһыанньа тыҥаан, устудьуоннар бары дойдуларыгар Саха сиригэр кэлэн, дистанционнай көрүҥүнэн — ыраахтан үөрэнэ сылдьаллар.

Маҥнайгы сэмиэстири устудьуоннар хайдах туттарбыттарын, улахан куоракка адаптация хайдах барбытын уонна ыраахтан олорон үөрэнии тэрээһинэ хайдаҕын туһунан мин 6-с устуудьуйа куратора Лена ТИМОФЕЕВАТТАН ыйыталастым.

6-с устуудьуйа уус-уран салайааччыта, бэрэпиэссэр, РФ норуодунай артыыһа Борис Клюевтыын уонна режиссер Андрей Борисовтыын.

Саха национальнай театральнай 6-с устуудьуйатыгар 23 оҕо үөрэнэ сылдьар. Итиэннэ саха устуудьуйатыгар японка Мива Янагихара көҥүл истээччинэн кэлбитэ. Онон 24-тэр. Бастакы сэмиэстири үчүгэйдик туттарбыттара – 9 туйгун үөрэнээччилээхпит уоннааҕылар “хорошистар”, — диир Лена Васильевна.

«История Малого театра» уруок кэмигэр…

Кэнэҕэски артыыстар, биир саамай интэриэһинэйэ, үгэс буолбут уруоктары таһынан,  сахалыы тойукка үөрэнэллэр эбит.

5 көлүөнэ педагог!

Маҥнайгы сэмиэстиргэ нэдиэлэҕэ үстэ саха тылын уруога буолбута.  Бастакы уруок – саха театральнай ускуустубатын устуоруйата, иккис – төрөөбүт литература, манна мин студиецтарга тыйаатырга турар айымньылары, дыраамалары үөрэппитим. Оттон үһүс уруок – тойук. Тойук – 6-с устуудьуйа уратыта буоллун диэн, Саха сириттэн салалтабыт быһаарбыта. Бу иннинээҕи биэс саха устуудьуйата нуучча классическай театральнай систиэмэтинэн үөрэнэн кэлбитэ. Оттон биһиги оҕолорбут эмиэ нуучча классическай театральнай Станиславскай систиэмэтинэн үөрэнэн баран, онно эбии дойдуларыгар тойуктаах кэлиэхтээхтэр. Олоҥхо тыйаатыра кырыымпа бэлэхтээбитэ, онон дьарыктаналлар. Уонна алтыс устуудьуйаҕа СӨ Култуура, ускуустуба кэллиэһин уонна АГИКИ-ни бүтэрбит тойуктаах оҕолор бааллар, кинилэр көмөлөрүнэн, бэйэ-бэйэлэрин үөрэтиһэн кэллилэр. Дьокуускайтан Олоҥхо тыйаатырыттан, Саха тыйаатырыттан тойуктаах артыыстар Москваҕа кэллэхтэринэ, устудьуоннарга хайаан даҕаны маастар-кылаас ыыталлар.

Актер маастарыстыбатыгар үөрэтэр педагог  Татьяна Николаевна Аносовалыын.

Алтыс устуудьуйа уус-уран салайааччытынан бэрэпиэссэр, Арассыыйа норуодунай артыыһа Борис Владимирович Клюев буолар. Кини, күн аайы да буолбатар,  устудьуоннарыгар дөрүн-дөрүн кэлэн кэпсэтэн-ипсэтэн, араас боппуруостары быһаарсар. Ардыгар биллэрбэккэ эрэ уруокка, дьарыкка тиийэн кэлээччи… Уопсайынан, идэҕэ бэлэмнээһиҥҥэ улахан болҕомто ууруллар.  Дьэ ити курдук, бастакы сэмиэстирбит үчүгэйдик түмүктэммитэ. Биллэн турар, кэрэ куоракка — Улуу Москваҕа олорор, үөрэнэр бэйэтэ ураты дьайыылаах буоллаҕа! Уһун өрөбүлгэ японка дьүөгэбитин Саха сиригэр илдьэ кэлэммит, барыта эмиэ бэрт интэриэһинэй этэ. Онтон II сэмиэстиргэ Москваҕа тиийэн үөрэнэн истэхтэринэ коронавирус эпидемиятынан харантыын туран, бука бары дойдубутугар төннөн кэлбиппит балачча буолла. Сөмөлүөккэ субсидированнай билиэттэри булан, кэлбиппит. Мива эмиэ Япониятыгар дьиэлээбитэ. Көтөн кэлээт даҕаны самоизоляцияҕа олорбуппут уонна “суһал  лииньийэҕэ” эрийэммит, бары анаалыс туттарбыппыт. Биһиги устудьуоннарбыт сыаллаах үөрэххэ барбыт буоланнар, СӨ Үөрэҕин министиэристибэтэ уопсайынан кэтээн көрөр. Устудьуоннар билигин дистанционнай ньыманан – ыраахтан олорон үөрэнэ сылдьаллар.

«Сценическэй хамсаныы» дьарыгын кэнниттэн.

Тэрээһинигэр устуудьуйа ыстаарастата Ефрем Татаринов педагогтары кытта ыкса үлэлэстэ, үлэлэһэр. Үксэ уопсай үөрэхтээһин биридимиэттэрэ. Реферат суруйаллар, онлайн-кэмпириэнсийэлэргэ, сэминээрдэргэ кытталлар. Оттон, идэҕэ бэлэмнээһин биридимиэттэригэр,  холобур,  сценическэй саҥаҕа бастакы сорудах – Пушкин остуоруйаларын ааҕыы буолбута, ону бастаан нууччалыы, онтон сахалыы нойосуус үөрэтэн баран, видео-звоногунан сибээстэһэн, иһитиннэрэллэр, онуоха маастар сүбэлээн-амалаан, чочуйан биэрэр. Барыта Москва бириэмэтинэн буолан, кыра уустуктар баар буолааччылар. Ол гынан баран, этэҥҥэ баран иһэр, барыта — хонтуруолга, преподавателлэр онлайн-билсэ олороллор. Онон,  устудьуоннарбыт кэлэр да сиэссийэлэрин этэҥҥэ үчүгэйдик туттаралларыгар эрэллээхпит, — диэн кэпсээнин түмүктүүр Лена Тимофеева.

Билигин щепкинецтэргэ, бу кэлэр ыам ыйыгар, уопсай үөрэхтээһин дьиссипилиинэлэринэн онлайн-сиэссийэлэрэ саҕаланаары турар. Онон, бэлэмнэнии күүһүрбүт.

 

ХХХ

Манна эбэн эттэххэ, куратор, ыраахтан олорон үөрэнии, холобур, үҥкүү, вокал, сценическэй хамсаныы уруоктарыгар табыгастаах буоллаҕына,  актер маастарыстыбата дистанционнайдык тахсыбат эбит диир. Тустаах, индивидуальнай үлэ буоллаҕа.   Ол иһин кэнэҕэски артыыстар этюдтарын дьиэлэригэр бэйэлэрэ бэлэмнииллэр.

Кэскил Баишев кэнсиэригэр сырыттылар.

Быйылгы 6-с устуудьуйа өссө биир уратыта – актер маастарыстыбатыгар саха устудьуоннарын 5 көлүөнэ (!) педагог, онтон иккитэ тыйаатырга быһаччы үлэлии сылдьар дьон, үөрэтэр. Бу эмиэ үгүһү-элбэҕи этэр.

Татьяна МАРКОВА, edersaas.ru

 Сүрүн хаартыскаҕа: Москва устун экскурсияҕа.

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

17 + 14 =