«Тэтим» араадьыйа Тааттаҕа үлэлээтэ

Ааптар: 
Бөлөххө киир:

«Саха» НКИХ «Тэтим» араадьыйата бу сарсыардаттан киэһээҥҥэ диэри Таатта улууһугар үлэлээтэ.

edersaas.ru

«Тэтимнэр» өссө Нам улууһугар сырыттахтарына, таатталар ыҥырыылара аһаҕас эпиир нөҥүө кэлбитэ.

Онон Таатта улууһун салалтатын  ыҥырыытынан «Тэтим» араадьыйа көһө сылдьар устуудьуйата бүгүн күнү быһа улуус олоҕун хорутуулаахтык сырдатта.

Биир сүрүн түһүмэҕинэн  саха литературатын төрүттэччилэртэн биирдэстэрэ Николай Неустроев төрөөбүтэ 125 сылын көрсө улуус уран тарбахтаахтара, уустара, айар талааннаахтара төрөөбүт Таатталарын  култууратын туһунан киэҥник кэпсээтилэр.

Бастыҥ дьиэ кэргэттэр кыттыылаах аһаҕас эпиирдэр истээччилэри түмэ тартылар. Маны сэргэ Таатта үлэһит дьоно көһө сылдьар устуудьуйаҕа ыалдьыттаатылар.

Таатталар иитэр-үөрэтэр эйгэни оҕо ууйааннарыттан саҕалаан оскуолаларга эбии үөрэхтээһин тэрилтэлэригэр  хайдах тэрийэллэрин, оҕону сахалыы иитэллэрин, спорт сайдыытын туһунан кэпсэтиилэрин Саха араадьыйатын истээччилэрэ астына иһиттилэр, сэргээтилэр. Быһа эпиирдэргэ үгүс ыйытыы киирдэ.

Саха араадьыйатын 90 сыллаах үбүлүөйүн көрсө тыа сиригэр тиийэн үлэлээһин үгэскэ кубулуйан эрэрэ кэрэхсэбиллээх. Ый  аайы улуустарынан сылдьан сарсыардаттан киэһээҥҥэ диэри эпиирдээн, улуус олоҕун, талааннаах дьонун сырдатыыбытын үгүс истээччи сэргээтэ. Үгүс сайаапка киирбитинэн, мантан саас  «Тэтим» араадьыйатын айар үлэһиттэрин ыырдара кэҥээн, аны ыраах улуустарынан айанныахтара, — диэн санаатын үллэһиннэ «Тэтим» араадьыйа дириэктэрэ Николай Бэстиинэп.

Онон сонун сүүрээн олоххо бигэтик киирэн, Саха араадьыйатын көһө сылдьар устуудьуйатын суруналыыстара күнүс араадьыйа эпиирин ыытан баран, киэһэтин улуус олохтоохторун кытта көрсөн, санаа атастаһан, кэнсиэртээн, биир күн иһигэр бэрт элбэх үлэни оҥорон кэлэр буоллулар.

Елена ПОТОЦКАЯ, «Саха сирэ» хаһыат, edersaas.ru

Хаартыска — «Тэтим» араадьыйа айар кэлэктиибин архыыба.

+1
0
+1
0
+1
0
+1
0
+1
0
+1
0
+1
0