Бүгүн тымныыны чинчийэр тест-эспэдиисийэ састаабыгар киирбит Арассыыйаҕа киэҥник биллэр суруналыыстар уонна блогердар бэйэлэрин аргыстарын кытта ыраах айаҥҥа туруннулар.
edersaas.ru
Бэлиэтээн аһарбыппыт курдук, эспэдиисийэ кыттааччылара стационарнай ньыманан — лааҕырга датчиктардаах метеобудкалары туруоран уонна мобильнай ньыманан — 5-10 км радиустаах сиргэ табанан тиийэн анал цифровой термометрынан кэтээн көрүөхтэрэ. Күнү-дьылы кэтээн көрүү урут хаһан да ыытыллыбатах сирдэргэ ыытыллыаҕа. Оннук сирдэринэн Өймөкөөн улууһун Бурустаах (Аартык бөһүөлэгиттэн чугас) уонна Дьааҥы улууһун Киэҥ Үрэх диэн сирдэрэ буоллулар. Томпо Развилкатыттан эспэдиисийэ икки аҥы хайдыһан айанныахтара.
Саха сирин Гидрометкиинин салайааччытын солбуйааччы Вячеслав Шехиров айаҥҥа турунар тест-эпэдиисийэ хорсун дьонугар кэлэр нэдиэлэҕэ кинилэр үлэлиэхтээх сирдэригэр ханнык күн-дьыл туруон сөбүн билиһиннэрдэ:
— Өймөкөөн улууһугар бүгүҥҥү күҥҥэ тымныы антициклон кэлэн турар. Саха сирин үрдүнэн бу оройуоҥҥа саамай тымныы күн-дьыл Өймөкөөн нэһилиэгэр -53 кыраадыс бэлиэтэннэ. Кэлэр күннэргэ Депутатскайга — 54, Верхоянскайга – 46, Уус-Ньараҕа — 51 кыраадыс тымныы түһүөн сөп. Онон саамай тымныы кэмҥэ баран эрэр буолан, тест-эспэдиисийэ чилиэннэриттэн ким эмэ саамай тымныы кыраадыһы бэлиэтиир дьоллонуоҕа.
Биллэн турар, ханна ордук тымныытын билиэн баҕалаахтарынан икки саамай тымныы – Дьааҥы уонна Өймөкөөн улуустарын олохтоохторо буолаллар. Ол да иһин кинилэр социальнай ситимнэри кыраҕытык кэтии олороллор. Эспэдиисийэ кыттыылаахтарыгар ситиһиилээх үлэни баҕарабыт.
Елена ПОТОЦКАЯ, «Саха сирэ» хаһыат, edersaas.ru
Хаартыска – социальнай ситимнэртэн уонна ааптар түһэриитэ