50 тэрилтэ, 1000 үлэ миэстэтэ

Бөлөххө киир:

Урут сэбиэскэй кэм саҕана үлэтэ суох киһи диэн суох этэ. Дьон үксэ хаһан биэнсийэҕэ тахсыахтарыгар диэри биир үлэҕэ үлэлииллэрэ. Оттон билигин оннооҕор үрдүк үөрэхтээх исписэлиистэр үлэ көрдөөн, тэрилтэ үтүмэнин, дьаарбаҥка арааһын кэрийэллэр.

edersaas.ru

Сыл ахсын муус устарга РФ Дьарыктаах буолууга сулууспатын күнүгэр Дьокуускай куорат дьарыктаах буолууга киинэ үлэ дьаарбаҥкатын тэрийэн ыытар. 2018 с. Саха сиригэр Дьарыктаах буолуу сыла биллэриллэн, бу сытыы кыһалҕаҕа улахан болҕомто ууруллар.  СӨ Нэһилиэнньэ дьарыктаах буолуутугар судаарыстыбаннай кэмитиэтин кытта сүбэлэрин холбоон, «Куруһаала» атыы-эргиэн киинигэр буолбут быйылгы дьаарбаҥка ханнык тэрилтэлэргэ үлэ миэстэтэ баарынан муҥурдаммакка, бэрт сэргэх тыыннаах ыытылынна.

Резюме

Резюмены сөпкө суруйуу – ситиһии аҥаара. Уйулҕа үөрэхтээхтэрэ уонна каадыр үлэһиттэрэ дьаарбаҥкаҕа кэлбит дьону бэйэлэрин хайдах рекламалаан суруйарга үөрэттилэр, тэрилтэ салайааччытын кытта үлэҕэ киирэргэ кэпсэтэргэ сүбэ-ама биэрдилэр. «Кэпсэтии оскуолата» тренинг, ­маастар-кылаас, «Импульс» ыччат үлэҕэ биржата «WORKTIME» — «Идэҕэ бастыҥ» челлендж, ону таһынан, үс хампаанньаҕа эдэр буҕаалтырдарга уонна экэнэмиистэргэ ассессмент тэрийдилэр. Хамнастаах улахан тэрилтэҕэ биир миэстэҕэ отучча киһи күрэстэһиэн сөп, хас да таһымнаах тургутук кэнниттэн  3-5 хандьыдаат хааланнар, ассессмент саамай сүрүн сыанабылы ааһаннар, биирдэстэрин талан ылаллар. Маны ситиһиилэхтик ааһарга эмиэ үөрэттилэр.

Дьаарбаҥка

Дьаарбаҥка кэмигэр «Колмар», «Селигдар көмүһэ» бырамыысыланнай хампаанньалары кытта видеокэмпириэнсийэ тэрилиннэ. “Үлэ биэрээччини кытта кэпсэтии» аахсыйа чэрчитинэн, «Арктик-Капитал», «Сахатранснефтегаз», «Прогноз» тэрилтэҕэ үлэҕэ хайдах киириэххэ сөбүн ыйыталастылар. Сахалинскай уобаластан туһааннаах тэрилтэлэр онлайн сибээскэ тахсан, онно хайдах көһөн тиийэн, хам­настаах үлэ булуохха сөбүн туһунан кэпсээтилэр.

Идэтинэн өр кэмҥэ үлэ булбатах, эбэ­тэр кыра хамнастаах үлэттэн хамнастаах тэрилтэлэр көһүөн баҕалаах киһи кылгас кэмнээх кууруска үөрэнэн, манипулятор кран, автогрейдер, бульдозер, экскаватор машиниһа, электрогазосварщик, хайа оробуочайа, проходчик, цистернэҕэ сэрэх­тээх таһаҕаһы таһар суоппар, кыргыттарга кондитер, бортунуой, повар, салайааччы сэкирэтээрэ идэни ылыан сөп. Үөрэх 7000 солк. үөһэ төлөбүрдээх эрээри, Дьарыктаах буолуу киинигэр учуокка турар үлэтэ суох дьону былаан быһыытынан босхо үөрэттэрэллэр.

Үлэ биэрээччилэр дьаарбаҥкаларын кэрийэн көрдөххө, баантан саҕалаан, бырамыысыланнай хампаанньаларга, бүддьүөт тэрилтэлэригэр тиийэ бааллар.

Баахтанан үлэлии барыан баҕалаах күүстээх аҥаардар карьерга 30-40 туонна таһаҕаһы тиэйэр “БЕЛАЗ”, “Perlini» самосвалы ыытарга “Профресурс” кииҥҥэ 35 000 солк. үөрэнэн, идэ ылан, Алдан көмүһүгэр, Нерюнгри таас чоҕор практикаланан, устунан онно үлэлии хаалаллар. Оччотугар үөрэхтэрин ороскуотун ый аҥаарын иһигэр толуйар кыахтаналлар.

Онон, уолаттар хара үлэни кыайар, эдэр-сэнэх эрдэхтэринэ бырамыысыланнай хампаанньаларга киирэн, дьиэ кэргэннэрин иитэн, дьиэлэнэн-уоттанан, олохторун уйгутун тупсарыахтарын сөп.

Мария Слепцова, Дьокуускай куорат дьарыктаах буолууга киинин салайааччыта:

— Дьаарбаҥкаҕа бүгүн 50 тэрилтэ 1000 үлэ миэстэтин таһаарда, кылгас кэмнээх куурустары тэрийэр 10 үөрэх тэрилтэтэ кытынна. Идэтинэн сатаан үлэ булбатах киһи Дьарыктаах буолуу сайтыгар киирэн, http://czn.ykt.ru/ регистрацияланан, 5000 үлэ миэстэтин көрөн-истэн, бэйэтигэр сөптөөҕү булуо.

Марианна Тыртыкова, edersaas.ru

+1
0
+1
0
+1
0
+1
0
+1
0
+1
0
+1
0