Олоххо киһи сөҕөр талааннаах дьонун көрсөн, кэрэни сатаан айан, оҥорон таһаарар сатабылларын, кыахтарын сөҕө-махтайа саныыгын. Талааннарын таһынан үтүө суобастаах, көнө, сымнаҕас майгылаах буоллахтарына, олох маннык дьикти бэлэх оҥорбутуттан үөрэҕин, астынаҕын. Бүгүн кэпсиир дьоруойум — уһуйааммыт тарбаҕар ураты талааннаах Далбар Хотуна Мария Ивановна Жиркова.
edersaas.ru
Мария Ивановна “Кэскил» уһуйааҥҥа таҥас сууйааччынан үлэлиир. Үлэтигэр олус бэриниилээх, оҕолорго, бииргэ үлэлиир дьонугар истиҥ сыһыаннаах, сымнаҕас майгылаах. Куруук сүбэлээн-амалаан, ыйан-кэрдэн, эйэҕэс эдьиий, иһирэх ийэ, элэккэй эбэ кэриэтэ. Аргыый наллаан саҥарар, ыксаабакка туттар-хаптар эрээри, барытын кэмин иннинэ бүтэрэн-оһорон, оҥорон-тупсаран кэбиспитэ эрэ баар буолар. Үөрэн мичилийэн киирэн кэллэҕинэ, бэл, уһуйааммыт иһэ сырдаабыкка дылы буолар.
Оҕо утуйар таҥаһын-сабын, кыра остуол сабыытын, илии сотторун, түннүк сабыытын барытын мээрэйдээн-кырыйан, кичэйэн киэргэтэн бэйэтэ тигэр. Үөһэ көрөр олбох мастары (поднос) кырааскалаан саҥардыбыта.
Ону таһынан, Мария Ивановна көмүс тарбахтаах диэтэхпинэ сыыспатым буолуо. Тус баҕатынан уһуйаан истиин-тастыын кэрэ, ураты көстүүлээх буоларыгар улахан сыратын уурар, саҥаттан саҥа оҥоһуктарынан киэргэтэр, тупсарар. Сибэкки үүннэрэрин, көрөрүн-харайарын таһынан, олус тупсаҕай көстүүлээх гына ситэрэн биэрбитэ күн ахсын оҕо-аймах хараҕын үөрдэр, санааны манньытар. Кэнники кэмҥэ фоамиранынан араас сибэкки оҥорорунан үлүһүйэн, киһи сатаабатаҕа, кыайбатаҕа суох диэн санааны итэҕэтэр.
Сибэкки муннугун киэргэтииттэн саҕалаан, билигин киһи үрдүгүн саҕа уһуннаах дьэрэкээн сибэккилэри оҥорон бүтэрдэ. Үлэтинэн, сөбүлүүр дьарыгынан эрэ муҥурдаммакка, уһуйаан кырачаан иитиллээччилэригэр туустаах тиэстэ кистэлэҥин арыйар. Оҕолор олус сөбүлээн дьарыктаналлар, араас оҥоһуктара бөлөх, уһуйаан иһин киэргэтэллэр. Поролонунан төбөҕө кэтэр мааскалары, папье-маше ньыматынан тыйаатыр куукулаларын, кумааҕынан кырыйан Саҥа дьыллааҕы киэргэтиини, о.д.а. саҥаттан саҥа сонун ньыманы туттан, бииртэн биир тупсаҕай оҥоһугу бэлэхтээн иһэр. Мария Ивановна сатаабатаҕа, кыайбатаҕа диэн суох, кэрэни айан, оҥорон олус сөхтөрөр, үөрдэр.
Ис дууһатыттан бары сатабылын ууран, мэлдьи киэргэтэ, тупсара, айа-тута сылдьар, өрүү үөрүүнэн сыдьаайар күндү киһибитигэр, Далбар Хотун мааныта Мария Ивановна Жирковаҕа кытаанах доруобуйаны, элбэх үөрүүлээх түгэннэри баҕарабын. Талааныҥ арыллан, сатабылыҥ сайдан истин.
edersaas.ru саайтка анаан Лариса АТЛАСОВА.