Бэҕэһээ, тохсунньу 24 күнүгэр, СӨ үтүөлээх артыыската Тамара Попова-Хадаана Эстрада тыйаатырын саҥа дьиэтигэр «Ырыам кута» бырайыагы саҥа дьиэҕэ аан бастакынан саҕалаата.
edersaas.ru
Куорат уонна өрөспүүбүлүкэ олохтоохторо Эстрада тыйаатыра бэйэтэ туспа дьиэлэнэрин күүппүттэрэ ыраатта. Онон, “Европа” курдук улахан уораҕай тыйаатырга бэриллибитин туһунан үтүө сонун элбэх киһи санаатын көтөхтө.
Билиҥҥитэ дьиэ ис бараанын тыйаатыр ирдэбиллэригэр уларытыы, ситэрэн-хоторон биэрии үлэтэ күүскэ бара турар. Ол элбэх бириэмэни уонна үбү-харчыны эрэйэр. Тыйаатыр дириэктэрэ Татьяна Чаранская иһитиннэрбитинэн, көрөөччүлэргэ аналлаах улахан саала 1-2 сылынан толору бэлэм буолуо.
Ол да буоллар, тыйаатыр кэлэктиибэ манна номнуо олохсуйан, күүстээх үлэҕэ турунна. Көрөөччүлэргэ бэлэх уунаары сонунтан сонун бырайыактары толкуйдууллар. Ол курдук, үһүс мэндиэмэҥҥэ 70-ча киһи киирэр уонна балкоҥҥа миэстэлэрдээх аччыгый саалаҕа бастакы кэнсиэри Тамара Попова оҥордо. Ырыаһыт кэнсиэр бастакы чааһыгар тыыннаах муусука доҕуһуолунан дьоҥҥо биһирэммит уонна сабыс-саҥа ырыаларын толордо. Ол иһигэр, Наталия Михалева-Сайа тылларыгар «Махтанабын» уонна Борис Павлов тылларыгар «Эрдинии» ырыалары сүрэхтээтэ. Бу бырайыак ирдэбилинэн, ырыаһыттар саха эстрадатын атын толорооччутун уонна омук артыыһын ырыатын хайаан да толоруохтаахтар, репертуардарыгар киллэриэхтээхтэр. Хадаана туруу үлэһит, ырыаһыт быһыытынан саамай сүгүрүйэр ырыаһыта Сахаайа “Үрүҥ түүн” ырыатын уонна французтуу ырыаны толорон, күүстээх куоластааҕын, киэҥ диапазоннааҕын, артыыс быһыытынан маастарыстыбата үрдүгүн өссө төгүл көрдөрдө.
Т.Попова көрөөччүлэр суругунан ыйытыктарыгар хоруйдаата. Кини маннык кэнсиэри бастакынан саҕалыыр чиэс тиксибититтэн улаханнык долгуйбутун, билигин да көрөөччүгэ иһитиннэрэ илик ырыалара элбэҕин, биир сылынан улахан кэнсиэрин оҥорор, компакт-диискэ таһаарар, элбэхтик гастролларга сылдьар былааннааҕын уо.д.а. сэһэргээтэ. Көрөөччүлэр ырыаһыт истиҥ, аһаҕас билиниилэриттэн астыннылар, сибэккинэн симээтилэр. Онтон артыыска тыйаатырын дьаһалтатыгар, уус-уран салайааччытыгар, муусуканы чочуйааччыларга, мусукааннарыгар уо.д.а. бырайыакка кыттыспыт дьоҥҥо ис сүрэҕиттэн махтанна.
Биир дойдулаахтарын Сунтаар улууһун баһылыга Анатолий Григорьев уонна чугас дьүөгэтэ, поэтесса Наталия Михалева эҕэрдэлээтилэр. Анатолий Васильевич Татьяна Чаранскаяҕа Сунтаар улууһун кэрэһитэ – Аар баҕах сэргэ хаартыскатыттан хартыынаны бэлэхтээтэ. Бу күн ырыаһыт “Сунтаар улууһун култууратын сайдыытыгар өр сыллаах үлэтин, тус кылаатын иһин” мэтээлинэн наҕараадаланна.
Татьяна Чаранская бүгүҥҥү курдук тыыннаах доҕуһуолунан ыытыллар киэһэлэр инникитин өссө да салҕаныахтарын туһунан эттэ. Сотору кэминэн “Ырыа кута” бырайыакка Анатолий Горохов уонна Надина Эльпис ыалдьыттыахтара. Ону сэргэ, ким баҕарар бу бырайыак кыттыылаахтарын менюларынан толкуйдаммыт бүлүүдэлэри тыйаатыр буфетыгар кэлэн амсайыахтарын сөп.
Надежда ЕГОРОВА, “Саха сирэ” хаһыат, edersaas.ru