Бу күннэргэ «Саха» НКИХ тэлэбиидэнньэтин дириэксийэтэ Хаҥалас улууһун I Дьөппөн нэһилиэгэр тиийэн кыаммат ытык кырдьаҕастарга уонна элбэх оҕолоох ыалга аһымал аахсыйатын оҥордулар.
edersaas.ru
Дириэксийэ салайааччыта Олег Колесовы-Талбаны кытта бу сонун сүүрээн туһунан кэпсэттибит.
— Хампаанньабыт «Санаа күүһэ» диэн бырайыагы олоххо киллэрэн, биэриилэрбит дьон сэҥээриитин ыллылар. Сыл аайы биһиги муус устар 1 күнүгэр «Саха» НКИХ сааһа» диэн тэрээһини ыытабыт. Быйылгы тэрээһиммитин «Үтүө санаа сааһа» диэн ааттаан ыытаары бэлэмнэнэбит. Ол чэрчитинэн «Бэтэрээҥҥэ көмө» диэн аахсыйа тэрийбиппит.
Мин бу маннык аахсыйаны ыытар туһунан былырыыҥҥыттан ыла иитиэхтии сылдьыбытым. Дьиҥэр үгэс быһыытынан, хаар түһэриитэ, таһыыта курдук үлэни оҥоруохха сөп эбитэ буолуо эрээри, «мас хайытыыта өссө туһалаах буолуо дуу» диэн оннук үлэ баар сирин көрдөөбүтүм. Хайдах эрэ тута өйбөр Хаҥалас Тиит Эбэ нэһилиэгэ көтөн түспүтэ. Баһылык Сергей Прокопьевы кытта сибээстэһэн, икки тыыл бэтэрээнигэр — Иван Мушниковка уонна Антонина Сыромятниковаҕа мастарын хайытарга санаммыппыт.
Маны тэҥэ, 3 оҕолоох Степан уонна Саскылаана Сыромятниковтарга уонна 4 оҕолоох Константин уонна Мария Алексеевтарга бородууктанан көмөлөстүбүт.
Бу сырыыбыт өссө хампаанньа устуоруйатыгар киирдэ — аан бастакынан биир чааһы толору нэһилиэктэн тахсан, «Талбан» биэриини ыыттыбыт. Онон Тиит Эбэ атын нэһилиэктэргэ «күөх уоту» уматта, — диэн санаатын үллэһиннэ Олег Колесов-Талбан.
«Саха» НКИХ үлэһиттэрэ 14 буолан сырыттылар. 91 саастаах ытык кырдьаҕас маһын барытын хайыттылар.
Үлэ быыһыгар #саҥакүн @utronvksakha анаан матырыйааллары уһуллулар, эбии киэһэ «Талбан» биэриитин быһа эпииргэ таһаарда.
— I Дөппөн олус сэргэхтик олорор нэһилиэк эбит. Оҕуруот аһын, эти-үүтү соҕотуопкалааһын үлэтэ сайдыы суолугар үктэнэн, маҥнайгы хардыылара оҥоһуллан турар эбит. Ыччат таптаан олохсуйар, дьарыктаах, үлэ-хамнас аахсар. Биһигини бэркэ көрсүбүт баһылык Сергей Прокопьевка уонна нэһилиэк олохтоохторугар, түгэнинэн туһанан, истиҥ махталбын тиэрдэбин.
Дьоҥҥо үтүөнү аҕалар аахсыйаҕа киһи тус кылаатын киллэрэриттэн ордук суох! Күндү доҕоттор, биһиги холобурбутун батыһан, ытык кырдьаҕастарбытыгар тустаах өйөбүлү оҥоруоҕуҥ диэн ыҥырабын,
Онон табаарыстарбар биир идэлээхтэрбэр , биир дойдулаахтарбар, түгэнинэн туһанан, бары санаабыккыт кэмигэр туола турдун диэн баҕа санаабын этэбин. — диэн Олег Колесов санаатын тиэртэ.
Елена ПОТОЦКАЯ, «Саха сирэ» хаһыат,edersaas.ru
Хаартыска Олег Колесов-Талбан дьиэтээҕи архыыбыттан