Амма улууһун Чакыр сэлиэнньэтин олохтооҕо ойуурга уот туруутугар кини туох да сыһыана суоҕун туһунан көрдөрүүнү силиэстийэ да, суут да кэмигэр биэрбит. Ол эрэн, суут мунньаҕар буруйа дакаастанан, бу дьыалаҕа бириигэбэр тахсыбыт.
Ол курдук, суут быһаарбытынан, 2018 сыл ыам ыйын 27 күнүгэр бу киһи Чакыр сэлиэнньэтиттэн 10 км ыраах сиргэ сылдьан, окко ситэри умуллубатах табаҕын бырахпыт. Ол түмүгэр, сэтиэнэх от умайан, Покровскай учаастактааҕы лесничествотыгар киирэр 30 гектардаах тиит ойуур уокка былдьаммыт.
Бу дьалаҕай быһыы түмүгэр, 90. 504 солкуобай суумалаах хоромньу тахсыбыт.
Суут кинини РФ Холуобунай кодексатын 260-с ыст. 2-с чааһынан буруйдааҕынан билинэн, 1 сылга көннөрүнэр үлэҕэ уурары усулуобунайынан ааҕан, ый аайы дохуотуттан судаарыстыба туһатыгар 10%-нын тутарга анаабыт.
Маны таһынан, суут улуус борокуратууратын ирдэбил сайабылыанньатын өйөөн, сууттанааччыттан кини буруйу оҥоруутун түмүгэр тахсыбыт материальнай хоромньуну төлүүрүгэр уурбут.
Бириигэбэр сокуоннай күүһүгэр киирэ илик.
Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.