Эбээн Бытантай улууһугар сылын аайы төрөөбүт сирбит-уоппут аатын ааттатар, саамай тутаах үлэһит дьоммутун чиэстиир бырааһынньыгынан Табаһыттар сүлүөттэрэ буолар.
edersaas.ru
Быйылгы сүлүөт улуус дьаһалтатыгар тэриллибит сэминээртэн саҕаланна. Ыраах ыстаадалартан мустубут табаһыттарга социальнай бэлиитикэ тэрилтэтиттэн Любовь Слепцова, Ия Ковалева тыа хаһаайыстыбатын үлэһиттэригэр көрүллэр социальнай төлөбүрдэр, ыалларга, оҕолоох дьоҥҥо өйөбүллэр, бэтэрээннэргэ чэпчэтиилэр тустарынан кэпсээтилэр. Биэнсийэ сулууспатын исписэлииһэ Дина Горохова биэнсийэ эйгэтигэр киирбит уларыйыылар тустарынан, тыа хаһаайыстыбатыгар үлэлиир дьон биэнсийэҕэ хайдах, хаһан тахсыахтарын сөбүн сырдатта, ыйытыыларга хоруйдаата. Дьарыктаах буолуу киинин салайааччы Елена Ефимова быйыл сайыҥҥы сынньалаҥҥа ыстаадаҕа үлэлиир оҕолорго хас ыйга төһө хамнас көрүллэрин, онно туох докумуон ирдэнэрин туһунан кэпсээтэ. Социальнай страховка тэрилтэтин боломуочунайа Марианна Старостина бу эйгэҕэ туох уларыйыы баарын билиһиннэрдэ. Сааны харайан илдьэ сылдьыы ирдэбилин Альбина Хабарова быһаарда. Кэлиҥҥи сылларга адьырҕа кыыл, бөрө, олус элбээбитинэн, бөрөнү уодьуганныыр үлэ туһунан Айылҕа харыстабылын инспекциятыттан Виктор Стручков, тыа хаһаайыстыбатын салалтатыттан Сергей Аликов кэпсээтилэр. Табаһыттар салгыы Киин балыыһа көҕүлээһининэн, доруобуйаларын туругун көрдөрдүлэр, УЗИ-ны аастылар, ЭКГ-га түстүлэр, анаалыс туттардылар.
Арктика күнүгэр, Арассыыйаҕа тыйаатыр, Саха сиригэр Сомоҕолоһуу, Эбээн Бытантай улууһугар Чөл олох сылыгар аналлаах табаһыттар бырааһынньыктара Түгэһиир сиригэр буолла. Табаһыттар, үлэ кэлэктииптэрэ, нэһилиэктэртэн кэлбит ыалдьыттар эбээннии таҥастаах параадтаан киирдилэр. Хас биирдии ыалдьыт былыргы Дөлбүргэ үгэһинэн Айыылартан үтүө кэмнэр үүнүөхтэрин көрдөстүлэр, аал уотунан ыраастаннылар.
Оҕолор эбээннии имигэс үҥкүүнэн түһүлгэни киэргэттилэр, Дьокуускайтан кэлбит эбээн ырыаһыта Дмитрий Лебедев «Һээдьэ» үҥкүүнү оройуттан тутан, дьон-сэргэ һээдьэлээн элээртилэр. Үлэ кэлэктииптэрэ тордохтору туруоруннулар. Саккырыырдааҕы «Хаарчаана» уһуйаан кэлэктиибэ ыалдьыттары сылаас аһынан, итии үүттээх чэйинэн күндүлээн, үгүс киһи махталын ылла. Дьааҥытааҕы «Полюс холода» кэпэрэтиип (Портнягина Екатерина) уонна олохтоох урбаанньыттар ас-үөл арааһын атыылаатылар.
Өбүгэ саҕаттан тыыннанан, эбээн омугун өрүһүйбүт, хоту дойду маанылаах кыылын табаны көрөр-харайар табаһыттар: Горохов Николай, Горохов Эдуард, Слепцов Алексей, Захаров Анатолий, Колесов Василий, Колесов Тихон, Мартынов Алексей улуус баһылыгын Грамоталарынан бэлиэтэннилэр.
Табаһыттар бырааһынньыктарын саамай тыҥааһыннаах, күүтүүлээх күрэхтэринэн – табанан сүүрдүү буолар. Барыта сэттэ сүүрдүү буолан, бастаабыттар анал бириистэри туттулар. «Ноори», түргэн наарта, маамыкта быраҕыытын курдук көрүҥнэргэ ыччаттар күүстэрин холонон, дьулуурдарын тургутан көрдүлэр. Чэбдик салгынҥа күүлэйдээбит дьон үөрүү кыымын иҥэринэн, дьону кытары алтыһан, кэпсэтэн-ипсэтэн үөрэн-көтөн тарҕастылар.
-Биһиги табабыт баар буолан туспа улуус буолан олорорбутун бары өйдүөх тустаахпыт. Табаһыттарбыт биирдэ бөһүөлэккэ киирэр бырааһынньыктарыгар көхтөөхтүк кыттан, тэрээһиннээхтик дьаһанан, бу курдук салгыы баарбытын көрдөрөн үлэлэһиэхпитин наада. Түгэнинэн туһанан, табаһыттар сүлүөттэригэр бириис туруорбут тэрилтэ салайааччыларыгар, урбаанньыттарга итиэннэ түһүлгэ тэрийэн, дьону-сэргэни аһаппыт Дьарҕаалаах олохтоохторугар, улуус тэрилтэлэригэр махтанабыт, — диэтэ улуус баһылыгын солбуйааччыта Раиса Старостина.
Эбээн Бытантай национальнай улуус дьаһалтатын пресс-киинэ, «Саха сирэ» хаһыат, edersaas.ru