Табаҕы утарыы аан дойдутааҕы күнүн бэлиэтээтилэр...
Олох-дьаһах

Табаҕы утарыы аан дойдутааҕы күнүн бэлиэтээтилэр

Ыам ыйын 31 күнүгэр Орджоникидзе болуоссатыгар “Табаххын бырах” диэн акция ыытылынна. Устудьуоннар уонна оскуола үөрэнээччилэрэ сигаретаны минньигэс бириистэргэ атастаһарга ыҥырдылар. Бириистэри акция спонсора “Хозмаркет” туруорда.

 

 

Уу тырааныспарын институтун устудьуоннара Коля Ушаков уонна Антон Артемьев этэллэринэн, уулуссаҕа көрсүбүт дьонноруттан үгүстэрэ “табахтаабаппыт” диэн хоруйдууллар эбит. Оттон табахтыыр дьон сигареталарын бириискэ хамаҕатык атастаспыттар. Кинилэр преподавателлэрэ Константин Попович этэринэн, речник-устудьуоннар табахтаабаттар, үөрэх кыһатыгар табахтыыр кытаанахтык бобуллар эбит. Ол иһин бу акцияҕа көхтөөхтүк кыттыбыттар.

21-с №-дээх оскуола үөрэнээччилэрэ Инна Новгородова, Даша Перепелкина, Вика Саломей биир сигаретаны кэмпиэккэ, пачканы икки дьаабылыкаҕа атастаһыннарбыттар. Кыргыттар эдэр дьоҥҥо, ыччакка табахтыыр муода буолбатаҕын бэлиэтииллэр. Ааһан иһэр дьон акцияны сөбүлээбиттэр.

Бу кэмҥэ кроссфит хамсааһын актыбыыстара сигарета курдук оҥоһуллубт бэрэбинэҕэ  тоһоҕолору саайан, табахтан аккаастанарга ыҥырдылар. Билигин үгүс ыччат спордунан дьарыктанар, чөл олоҕу тутуһар, онон арыгыны, табаҕы амсайбат. Оттон «Disco Dolls» кэлэктиибин кыргыттара үҥкүү бэлэхтээн баран, акцияҕа кыттыстылар.

Виктория Оленова, тэрийээччи:

— “Город добра” диэн уопсастыбаннай түмсүүбүт бу маннык акцияны бэһис сылын ыытар. Хас сыл ахсын кыттааччы ахсаана элбээн иһэр. Куорат олохтоохторо биһиги ыҥырыыбытын ылынан, акцияҕа кыттыһалларыттан үөрэбит. Эдэр дьон  бэйэлэринэн чөл олоҕу аҕытаассыйалыыллара ыччакка ордук тиийимтиэ, көдьүүстээх буолар. Онон табахтан аккаастанар дьон элбээн иһэллэрэ үөрдэр.

Татьяна Бурцева.

Бэлэмнээтэ Ангелина Васильева, “Саха сирэ” хаһыат, edersaas.ru

1
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

четыре + 5 =