Бэс ыйа үүнээтин, ыһыахтар саҕаламмытынан бараллар. Бэл диэтэр, өрөспүүбүлүкэ холуонньаларыгар эмиэ.
Бэҕэһээ, бэс ыйын 15 күнүгэр, Табаҕатааҕы 7 №-дээх кытаанах эрэсиимнээх холуонньаҕа ыһыахтара үрдүк тэрээһиннээхтик ыытыллыбыт. Бу туһунан РФ Накаастабылы толорор федеральнай сулууспатын Саха сиринээҕи управлениетын (НТУ) пресс-сулууспата иһитиннэрдэ.
Тэрийээччилэр — НТУ Уопсастыбаннай сэбиэтэ, холуонньа дьаһалтата уонна хаайыылаахтар төрөппүттэрин сэбиэтэ.
Ыһыах буоларын быһыытынан, алгыс сиэриттэн-туомуттан саҕаламмыт. Салгыы «Айыы Арчыта» дьиэ таһыгар хомус быһыылаах фонтаны арыйыы буолбут.
Ыһыах саамай күүтүүлээх түгэнэ — саха эстрадатын артыыстарын кэнсиэрэ — олус сэргэхтик барбыт. Биллиилээх пародиспыт Александр Бурнашев көрдөөх үтүктүүлэрин ытыс тыаһынан ылыммыттар.
Ол кэнниттэн буруйдарын боруостааччылар мас тардыһыытыгар уонна хапсаҕайга күрэхтэспиттэр. Кыайыылаахтар бириистэринэн наҕараадаламмыттар.
Вера МАКАРОВА, «Саха сирэ» хаһыат, edersaas.ru
Хаартыскалар: Накаастабылы толорор управление пресс-сулууспата.