Табаҕа хаайыытыгар сэлии кыыл баар
Бэрээдэк - Олох-дьаһах

Табаҕа хаайыытыгар сэлии кыыл баар

Урут даҕаны, билигин даҕаны буруйдарын боруостааччылар ортолоругар тарбахтарыгар талааннаах уус дьон элбэҕин саха ааттаах барыта билэр. Табаҕатааҕы 7 №-дээх кытаанах эрэсиимнээх холуонньаҕа оннук киһи элбэх. 

edersaas.ru


РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрбитинэн, бу холуонньа производственнай учаастагар тутууга аналлаах тааһы бэлэмниир хаайыылаахтар Саха сирин биир аарыма бэлиэтин — сэлии кыыл скульптуратын — оҥорбуттар.

Бу иннинэ холуонньа дьаһалтатын уонна управление Уопсастыбаннай сэбиэтин чилиэннэрин өйөбүллэринэн, Дьөһөгөй итиэннэ Дьыл оҕуһун скульптураларын хаайыылаахтар эмиэ оҥорон тураллар.

Ону таһынан, сылын аайы холуонньаларга ыытыллар муус, хаар оҥоһуктар куонкурустарыгар Табаҕа хаайыытын айар куруһуогар дьарыктанааччылар куруук инники күөҥҥэ сылдьаллар.

Инньэ гынан, бэйэлэригэр эрэмньилээх буолан, аны туох эмит улаханы оҥордорбут диэн саҥа бырайыагы толкуйдаабыттар. Ол бырайыактарын олоххо киллэрэр туһуттан икки ыйы быһа үлэлээбиттэр.

Бастаан тимиртэн сэлии кыыл дьардьаматын оҥорбуттар, онтон сиэмэн булкааһыгын сыыйа кутан, уҥуохтуун-арҕахтыын, быһыылыын-таһаалыын сэлии кыылга үүт-маас майгынныыр скульптураны чочуйан таһаарбыттар.

Пресс-сулууспа бэлиэтииринэн, бу оҥоһугу холуонньа үлэһиттэрэ эрэ буолбакка, археология уонна палеонтология испэсэлиистэрэ эмиэ сөҕө-махтайа сыаналаабыттар.

Ол курдук, аан дойдуга сэлии кыылга аналлаах М.К.Аммосов аатынан ХИФУ иһинэн баар соҕотох мусуой дириэктэрэ Семен Григорьев маннык эппит:

— Туох да ааттаах, астык үлэ! Дьиктитэ диэн — маннык сүдү оҥоһугу хаайыыга, үлэлииргэ анал усулуобуйа суох сиригэр, оҥорбуттара. Бүгүҥҥү күҥҥэ өрөспүүбүлүкэҕэ баар «сэлии кыылларга» тэҥнээҕэ суох оҥоһук эбит. Хомолтолооҕо баар, маннык астык, табыллыбыт үлэни өрөспүүбүлүкэ олохтоохторо, ыалдьыттара көрөр кыахтара суоҕа.

Билигин бу скульптура Табаҕатааҕы хаайыы дьаһалтатын иннигэр турар. Баҕар, киин куорат былаастара маннык оҥоһугу өйдөөн көрөн, куораппыт ханнык эмит болуоссатын дуу, скверин дуу киэргэтээйэллэр?

Вера МАКАРОВА, «Саха сирэ» хаһыат, edersaas.ru

Хаартыска: Накаастабылы толорор управление пресс-сулууспата.

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

14 + 13 =