Батсаап ситимэ этэрбэс араадьыйатын тэҥэ. Ол эрээри, таҥара сэрэҕи таптыыр дииллэр.
Дойду үрдүнэн коронавирус дьаҥа туран, суһал эрэсиимҥэ олорбуппут ый кэриҥэ буолан эрэр. Таатта улууһугар коронавирус дьаҥар хаптарбыт оҕо Арассыыйа куоратыттан айаннаан кэлбит диэн сурах олохтоохтору аймаата. Маны чопчулаары, Таатта улууһун баһылыгын солбуйааччы Изабелла Сивцеваҕа сибээскэ тахса сырыттыбыт.
— Биһиэхэ, Тааттаҕа, 1 нүөмэрдээх оскуола-интэринээтигэр уонна лиссиэй интэринээтигэр 65 миэстэлээх обсерватор бэлэмнэниллэн, суһал эрэсиими тутуһан олоробут. Бу батсаапка тарҕанар кэпсээн маннык, муус устар 5 күнүгэр айаннаан кэлбит устудьуон, коронавирус дьаҥар хаптарбыт дьону кытта биир сөмөлүөккэ көтөн кэлбит. Дойдутугар кэлээт, дьонун кытта ханна да быкпакка бүгэн олорууну тутуспуттар. Кини обсерваторга киирдэ, анаалыс туттарда. Анаалыһын түмүгүн күүтэбит. Билиҥҥитэ температурата суох, туруга үчүгэй. Онон ыалдьыбыт киһи кэлбит диэн сурах оруна суох.
Ил Дархан быһа эпиирин кэнниттэн улууспут баһылыга Михаил Соров олохтоохторго эмиэ быһа сибээскэ тахсыаҕа.
Ульяна Захарова.