Ыраах айан суоппардарын өрөспүүбүлүкэтээҕи ассоциациятын Таатта улууһунааҕы филиала ааспыт сылга бэрт ситиһиилээхтик үлэлээтэ.
edersaas.ru
— Ааспыт сылга икки аҥар сыл хомуйбут «Алгыстаах айан» диэн кинигэни бэлэмнээн таһаардыбыт. Улууспут туруу үлэһит суоппардарын ахтыыларын, үлэлэрин хаартыскаларын биэрэн, баай ис хоһоонноох бэртээхэй кинигэ буолан таҕыста. Ону тэҥэ үгүс кыһалҕалаах дьоҥҥо илиибитин утары уунан, араас үтүө санаа аахсыйаларыгар кытынныбыт. Ыраах айан суоппардарын өрөспүүбүлүкэтээҕи ассоциацията өрөспүүбүлүкэ улуустарын аайы дальнобойщик—суоппардары түмпүтэ бэрт көдьүүстээх буолла, — диэн кэпсиир ыраах айан суоппардарын Тааттааҕы түмсүүтүн салайааччыта Никифор Кутугутов.
Салгыы Никифор Леонтьевич тохсунньу 2 күнүгэр Таатта дальнобойщиктара ыраах айан суоппардарыгар оҕолоругар уонна сиэннэригэр аптаах остуоруйа күнүн бэлэхтээбиттэрин туһунан кэпсээтэ:
— Тымныы оҕонньор Хаарчаананы кытта сыарҕалаах атынан сылдьан, суоппардар дьиэлэригэр ыалдьыттаатыбыт.
Оҕолор барахсаттар остуоруйа дьоруойдара дьиэлэригэр тиийэн кэлбиттэриттэн үөрэн, ким хоһоон аахта, ким ырыа ыллаата, ким хомуска оонньоон дьиэрэттэ. Таһырдьа сылдьар оҕолору атынан хатааһылаттыбыт.
Тымныы оҕонньор ороулун мин бэйэм толордум. Хаарчаананан түмсүүбүт биир эдэр суоппарын кэргэнэ Туйаара Сидорова буолла.
«Оҕолорго Саҥа дьыллааҕы бырааһынньыгы туох санааттан тэрийбиккитий?» — диэн ыйытыыбар Никифор Леонтьевич маннык хоруйдаата:
— Түмсүү чилиэннэрин оҕолоругар уонна сиэннэригэр биир саамай умнуллубат остуоруйа күнүн эрдэттэн толкуйдаан, сылгыһыт табаарыспытын кэпсэтэн баран, түмсүү суоппардарыттан сайаапка хомуйбуппут. Төрөппүттэр Саҥа дьыллааҕы бэлэхтэрин бэйэлэрэ бэлэмнээбиттэрэ. Онон ис сүрэхтэн тахсар, суоппардар дьиэ кэргэттэригэр бэртээхэй Саҥа дьылы бэлэхтээтибит диэн үөрэбит.
Наһаа үчүгэй тэрээһини тэрийэн, оҕолорбут барахсаттар да, кинилэр төрөппүттэрэ да астыннылар. Онон үүммүт сылбытын олус бэркэ саҕалаатыбыт. Ити курдук, хас биирдии тэрээһиммит дьон санаатыгар, дууһатыгар үтүө өйдөбүл буолан хааларын туһугар үлэлиибит, — диэн кэпсиир Тааттааҕы ыраах айан суоппардарын салайааччыта Никифор Кутугуков.
Соторутааҕыта Хаҥалас улууһун Тумул нэһилиэгин олохтоохторо кырачааннары үөрдүбүттэрин туһунан кэпсээн турабыт. Аны Таатта улууһуттан ыраах айан суоппардара бэртээхэй Саҥа дьыллааҕы бырааһынньыгы бэлэхтээбиттэрин туһунан биир үтүө сонун кэллэ. Суоппардар Саҥа дьыллааҕы бастакы тэрээһиннэриттэн кынаттанан, быйылгы сылы быһа үгүс үтүө дьыаланы оҥорон, биир дойдулаахтарын махталларын өссө да ылыахтара диэн эрэнэбит.
Елена ПОТОЦКАЯ, «Саха сирэ» хаһыат, edersaas.ru
Хаартыска — Никифор Кутугутов дьиэтээҕи архыыбыттан.