Тааттаҕа ситэриилээх былаас отчуота түмүктэннэ

Ааптар: 
Бөлөххө киир:

Ситэриилээх былаас Таатта улууһугар түмүктүүр отчуота бүгүн Ытык Күөлгэ Былатыан Ойуунускай аатынан норуодунай тыйаатырга буолла. Отчуоту истээри уонна сыаналаары, тыын боппуруостарын туруорсаары, ыйытыы да биэрээри саалаҕа лыык  курдук киһи муһунна.


Отчуот иннинэ олохтоохтор СӨ Тутуутун миниистиригэр Павел Аргуновка, доруобуйа харыстабылын миниистирин солбуйааччытыгар Людмила Вербицкаяҕа, Ил Түмэн Таатта-Чурапчы уокуругун дьокутаатыгар Михаил Гуляевка, Яков Ефимовка, ТХМ департаменын салайааччытыгар Алексей Жирковка, уо.д.а. оробуочай бөлөх чилиэннэригэр киирэн, атах тэпсэн олорон,  туох кыһалҕалаахтарын кэпсээтилэр, ыйытыыларын биэрдилэр. Ити кэнниттэн, таатталар улууска кураторынан анаммыт эдэр миниистир Павел Аргунов тыла-өһө олохтооҕун, ыйытыыларга киһи астынарын курдук толору хоруйдуурун, тутууга эрэ буолбакка, норуот хаһаайыстыбатын атын салааларыгар эмиэ быһаарсарын бэлиэтээтилэр.

Кини хаарбах дьиэни көтүрүү бырагырааматыгар Таатта улууһа хапсарын, манна дьон олорор дьиэтэ, хоту улуустары хааччыйарга 500 тонна оҕуруот аһын харайар сир Ытык Күөлгэ тутуллуохтааҕын иһитиннэрдэ. Маны сэргэ, сотору кэминэн Халыма федеральнай айан суола оҥоһулларынан сибээстээн, куораттан Тааттаҕа диэри аспаал бүрүөһүннээх суол тардыллыаҕын туһунан иһитиннэрдэ. Итиэннэ күҥҥэ 200 киһини көрөр саҥа поликлиника үбэ быһаарыллан,  2020-2022 сылларга 590 мөл.солк. суумалаах тутуу дьэндэйэн тахсыахтааҕын этэн, саалаҕа мустубут дьону улаханнык сэргэхситтэ. «Ону таһынан,  «Чуораанчык» оҕо саадын тутуута былааҥҥа баар. Оттон лиссиэй саҥа дьиэтин атаҕа эмиэ бэрт сотору кэминэн түһүөхтээх. Улуус дьаһалтатын дьиэтин  тутуута бүтүөхтээх. Хара Алдантан, Уус Тааттаттан ураты улуус бары нэһилиэктэригэр түргэн интэриниэт ситимэ тардыллыаҕа», — диэтэ кини.

«Үүнэр көлүөнэ пуондатын» үбүлээһининэн Ытык Күөлгэ Эстетическэй киин тутуллуохтаах. Таатта норуодунай тыйаатырыгар саҥа оборудование атыылаһарга бу пуонда көмөтө эмиэ үгүс», — диэн этэн туран, улуус баһылыга Михаил Соров тутуу миниистиригэр Павел Аргуновка махтанна. Маны сэргэ, үгүс киһи күүтэр ыйытыытыгар, олунньу бүтүүтэ 81 мөл.солк. суумалаах сэтинньи-ахсынньы-тохсунньу ыйдаах үүт харчыта түһүөхтээҕэ этиллэн, дьон санаата улаханнык көтөҕүлүннэ.

Таатталар өрөспүүбүлүкэҕэ үүт ыаһына 1941 сыллааҕы көрдөрүүнү кытта тэҥнэспит. Ынах-сүөһү төбөтүн ахсаана ааспыт үйэ саҥатынааҕы көрдөрүүгэ тиийэ таҥнары түспүт диэн дьаарханалларын биллэрдилэр. Онуоха ТХМ бэрэстэбиитэлэ Алексей Жирков: «Ынах ахсаана аҕыйаата эрээри, биир ынахтан үүт ыаһына элбээтэ, хаачыстыба тубуста.  Элбэх саҥа бырагыраама,» Агростартап» граннарын түмүктэрэ барыта биир-икки сылынан буолбакка, кэлин биллиэҕэ», — диэтэ.

Таатталар идэлээх сойуустарын аатыттан категориялаах үлэһиттэр (быраастар, учууталлар, култуура үлэһиттэрэ)  ахсааннарыгар хапсыбатах дьон нэһиилэ тиийинэн олороллорунан сибээстээн, кинилэр хамнастарын эмиэ үрдэтэргэ кытаанахтык туруорсалларын туһунан эттилэр. Кумааҕыга хас да лиистээх халыҥ боротокуол толоруллубутун кэнниттэн, ситэриилээх былаас отчуотун биһирииллэрин дохсун ытыс тыаһынан биллэрдилэр.

Марианна ТЫРТЫКОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0