Бүгүн, ыам ыйын 21 күнүгэр, Таатта улууһугар, Ытык Күөлгэ үһүс киһи анаалыһа коронавирус дьаҥар хаптарбытын көрдөрбүт.
Роспортребнадзор Таатта улууһунааҕы салаатын начаалынньыга Елена Тарасова улууска маннык иһитиннэриини ыытта:
—Ону таһынан, балыыһаҕа хантаактаах 5 киһи киллэриллибитэ. Туруктара, билиҥҥитэ, үчүгэй. Барыта 129 киһи хантаактааҕа чуолкайдаммыта. Ыам ыйын 16-20 күннэригэр хантаактаспыт дьонтон анаалыстар ылыллан ыытылыннылар.
Эрдэ ыытыллыбыт 35 киһи анаалыһа үчүгэй. Оттон үс киһи анаалыһын түмүгэ коронавирус дьаҥар хаптарбыттарын көрдөрдө. 14 киһи обсерваторга сытар. 115 киһи бэйэлэрин хааччахтанан олоророллор.
Хантаактаахтар олорор дьиэлэригэр, уопсайдарыгар, үлэлиир сирдэтигэр дезинфекциялыыр үлэлэр тиһиктээхтик ыытылла тураллар. Маҕаһыыннарга өйдөтөр дьаһаллар ыытыллаллар.
Тааттаҕа, ордук чуолаан Ытык Күөлгэ, коронавирус дьаҥа тарҕанар куттала баарынан, дьиэҕэ бэйэни хааччахтанан олоруу ирдэнэр. Дьон сылдьар сирдэригэр, маҕаһыыннарга, аптекаларга мааскалаах, бэрчээккилээх сылдьыы, бэйэ-бэйэттэн тэйиччи сылдьыыны тутуһуу булгуччулаах.
Тэрилтэҕэ дьаҥ киирбэтин, коронавируһу бохсор туһугар:
- Киирэр ааҥҥа, үлэһиттэр киирэн иһэн, илиилэрин атисептигынан булгуччу ыстаралларын курдук усулуобуйа баар буолара ирдэнэр. Антисептиктар булгуччу ууруллуохтаахтар.
- Хас сарсыарда ахсын киирэргэ «фильтр» тэриллиэхтээх. Кыраадыстара бэрэбиэркэлэниэхтээх, ОРВИ-лаах, атын дьону кытары хантаактаах үлэһит тэрилтэҕэ киириэ суохтаах, дьиэтигэр олоруохтаах.
- Куораттан кэлбит дьон хайаан да 14 күн дьиэҕэ хааччахтанан олорууну тутуһуохтаахтар. Ол эрэ кэнниттэн үлэҕэ кэлиэхтээхтэр.
- Докумуоннары электроннай почтанан, төлөпүөнүнэн биэрии тэриллиэхтээх.
- Тэрилтэҕэ дезинфекциялыыр тэрээһиннэр тиһиктэниэхтээхтэр. Ол эбэтэр, хас иккилии чаас аайы сууйуу, салгылатыы, аан тутаахтарын хлордаах маарыланан эрийии, салгыны бактерициднай лаампанан дезинфекциялааһын ыытыллыахтаах, бэйэ-бэйэттэн тэйиччи сылдьыы тутуһуллуохтаах, бииргэ мустуу кытаанахтык бобуллар.
Елена Тарасова, Роспотребнадзор Таатта улууһунааҕы салаатын начаалынньыга