Эрдэ иһитиннэрбиппит курдук, Таатта улууһун Ытык Күөл сэлиэнньэтигэр бу дьыл сэтинньи 16 күнүгэр алдьархай тахсыбыта — балтараа саастаах оҕо үлүйэн өлбүтэ, оттон кини 3 саастаах убайа илиитин-атаҕын үлүтэн, балыыһаҕа киллэриллибитэ.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, бу чахчынан холуобунай дьыала тэрилиннэ. РФ Холуобунай кодексатын 109-с ыст. 1 чааһынан, ол эбэтэр, сэрэҕэ суохтан өлүүгэ тиэрдии бэлиэтэ баарынан. Силиэстийэ сабаҕалыырынан, бу оҕолор аһыы утаҕы сөбүлээн иһэр ийэлэрэ, кырачаан уолаттарын дьиэлэригэр соҕотохтуу хааллартаан, утуйбуттарынан туһанан, бөх тоҕо тахсан баран, устунан арыгылыы барбыт. 25 саастаах ийэ бэйэтэ билиммитинэн, сарсыарда билэр киһитин дьиэтигэр уһуктубут, онуоха диэри туох буолбутун өйдөөбөт.
Быраабы араҥаччылыыр уорганнарга кыракый эрэйдээхтэр эбэлэрэ тыллаабыт — кини сэтинньи 17 күнүн сарсыардатыгар дьүөгэтиттэн кэлээт, бу ынырыктаах быһылааны илэ хараҕынан көрбүт: дьиэ аана аһаҕас, балтараа саастаах сиэнэ муостаҕа номнуо көһүйэн, онтон улахана ороҥҥо суорҕаны бүрүнэн сытаахтыыллар эбит.
Силиэстийэ быһаарбытынан, 3 саастаах оҕо таһырдьа атах сыгынньах тахса сылдьыбыт, ол түмүгэр, илиилэрин уонна тилэҕин үлүппүт. Хаарга кини илиилэрин уонна атахтарын суола хаалбыт. Дьиэ иһигэр + 7 кыраадыс эрэ, оттон таһырдьа — 30 кыраадыс тымныы эбит.
Судмедэкспертиза быһаарбытынан, кыракый оҕо тымныыттан үлүйэн өлбүт.
Силиэстийэ кэмигэр силиэдэбэтэллэр муниципальнай тэриллии сокуоннай саастарын ситэ илик оҕолор дьыалаларыгар хамыыһыйатын, улуустааҕы полиция сокуоннай саастарын ситэ илик оҕолор дьыалаларыгар алын салаатын, эппиэкэ уорганнарын үлэһиттэрин дуоһунастарын эбээһинэһин хайдах толороллоругар сыанабыл биэриэхтэрэ уонна миэрэ ылыахтара.
Вера МАКАРОВА.