Дьаҥ кэмигэр таас чоҕу хайдах хостуулларый?

Ааптар: 
Бөлөххө киир:

Таас чоҕу хостооһун тиһигин быспакка үлэлиир салааларга киирсэр. Таас чох — тыын суолталаах ресурса, онон үлэ ыксаллаах быһыы-майгы усулуобуйатыгар тохтуура сатаммат. Холобур, ааспыт үс ый түмүгүнэн “Якутуголь” 1,4 мөлүйүөн туонна чоҕу хостоото. Ити ааспыт кыбаарталтан 15 %-нан элбэх.

“Якутуголь” хампаанньа пандемия саамай үгэнигэр даҕаны үлэтин тохтоппот, тыһыынчанан киһи күн аайы үлэтигэр тахсар. Дьаҥ тарҕаныытын утары маннык тэрилтэҕэ хайдах охсуһалларый?

Тэрилтэҕэ сыстыганнаах ыарыыны киллэрбэт сыалтан элбэх көмүскэнэр тэрээһиннэри ыыттылар. Үлэһиттэр көмүскэнэр тэриллэринэн толору хааччылыннылар: фильтрдаах мааскалар уонна антисептиктар бары үлэһиттэргэ түҥэтилиннэ.

Хампаанньа хонтуораларыгар көҥүл киирии бобуллан турар — кытаанах пропуск эрэсиимэ тутуһуллар. Киириигэ үлэһиттэр температураларын кээмэйдииллэр уонна дезинфекция оҥороллор. Киирэр турникет иннигэр анал бэлиэлэр бэйэ-бэйэттэн 1,5 миэтэрэ тэйиччи турууну тутуһарга күһэйэллэр.

Үлэһиттэр температуралара күҥҥэ хас да төгүл бэрэбиэркэлэнэр. Үлэһит этэ-сиинэ 37 кыраадыстан үрдүк буоллаҕына, тута үлэтиттэн тохтотоллор уонна балыыһаҕа ыытыллар.

Үлэлиир сири уруккуттан кичэллээхтик ыраастыылар, сууйар убаҕастарга дезинфекциялыыр сириэстибэлэри куталлар. Ордук күүскэ аан тутаахтарын, уот араарар тэриллэри, кирилиэс тутуһар сирдэрин уо.д.а. сууйаллар-сотоллор. Сутуллууну утары 50 киһи үлэлиир.

Хампаанньа медпууннарыгар эбии үлэһиттэр таҕыстылар. Дьону үлэ иннинэ уонна бүтүүтэ медосмотр кэтиир, үмүөрүспэттэрин курдук медпуун графигынан үлэлиир.

Профилактическай дьаһаллар тутуһулларын инниттэн дьиэлэргэ былакааттары ыйаатылар. Өйдөтүү үлэтин ыытар киин тэрилиннэ.

Оҥорон таһаарар үлэҕэ быһаччы сыһыана суох үлэһиттэр дьиэттэн олорон үлэлиир эрэсиимҥэ көспүттэрэ. Кумааҕы, докумуон үлэтэ барыта кэриэтэ, дьиэттэн, бэйэни хааччахтаныы эрэсиимигэр олорон оҥоһуллар.

Дьаҥ турбутунан сибээстээн, куоракка айан, оптуобустар сырыылара аччаата. Ол оннугар “Якутуголь” хампаанньа үлэһиттэрин 13-тэн 22 сырыыга тиийэ элбэттэ.

«Якутуголь» Нерюнгритааҕы киин балыыһа быраастара олороллоругар бэйэтин санаторийын анаата. Быраастар төрөппүттэрин, аймахтарын дьаҥҥа сутуйбаттарын туһуттан үлэ сменатын кэнниттэн дьиэлэригэр барбакка, “Горизонт” санаторийга олохсуйдулар. Балыыһа үлэһиттэригэр диэн санаторий икки этээһин туран биэрдилэр. Санаторийга, кыһалҕа үөскээтэҕинэ, 70-ча киһини 14 күннээх харантыыҥҥа олордуохха сөп.

Бу курдук таас чох хостооһуна ситимин быспакка үлэлии турар. Чох графигынан хостонор, оттугу ылааччыларга быыстала суох ыытыллар.

АО ХК “Якутуголь” пресс-сулууспытын

матырыйаалыттан Егор Карпов бэлэмнээтэ.

edersaas.ru

+1
0
+1
0
+1
0
+1
0
+1
0
+1
0
+1
0