Халлаан сылыйаатын кытта, түннүктэри, форточкалары аһан кэбиһэр идэлээхпит. Онтубут хаамар, онно-манна ыттар буолбут оҕону кыл да түгэҥҥэ соҕотохтуу хааллардахха, ыарахан содуллаах буолуон сөп. Статистика этэринэн, сылын аайы дойду үрдүнэн тыһыынчанан оҕо түннүктэн түһэн өлөр биитэр улаханнык эчэйэр.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, былырыын өрөспүүбүлүкэ үрдүнэн 8 оҕо түннүктэн түспүт чахчыта бэлиэтэммитэ, оттон быйыл — номнуо икки түбэлтэ.
Ол курдук, ыам ыйын 4 күнүгэр өрөспүүбүлүкэтээҕи 1 №-дээх Медицина киинигэр 7 саастаах оҕо киллэриллибит. Оҕо эрэйдээх дьиэ алтыс этээһиттэн сууллан, балыыһаҕа тыына быстыбыт…
Ыам ыйын 7 күнүгэр Мэҥэ Хаҥалас улууһун Аллараа Бэстээх бөһүөлэгэр 5 саастаах оҕо түннүктэн түһэн, ыарахан эчэйиилэри ылан, улуустааҕы балыыһаҕа сытар.
Бэрэбиэркэ быһаарбытынан, ити кэмҥэ оҕолор төрөппүттэрэ дьиэлэригэр суох эбиттэр. Билигин бу чахчыларынан процессуальнай бэрэбиэркэ барар.
Силиэстийэлиир управление оҕолоргутугар болҕомтолоох буоларга ыҥырар: түннүктэргэ, балконнарга анал сомуоктары туруоруҥ, кыра оҕолору дьиэлэригэр соҕотохтуу хаалларымаҥ!
Санатар буоллахха, 2016 сыллаахтан маннык быһылааннар туохтан сылтаан тахсалларын силиэстийэ уорганнара ырытан-үөрэтэн көрөн баран, пластиковай түннүктэр аһыллалларын харгыстыыр анал сомуоктары туруоруохха наада диэн быһаарбыттара. Ити этиилэрэ өйөбүлү ылан, 2016 балаҕан ыйын 1 күнүттэн олоххо киирбитэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.