Коронавирус дьаҥын бохсууга үлэлэһэр Тааттатааҕы суһал ыстаап бүгүн, ыам ыйын 31 күнүгэр, саҥа иһитиннэриини ыытта.
—Ыам ыйын 31 күнүнээҕи туругунан, балыыһаҕа сытар киһи ахсаана — 9, оттон 7 киһи анаалыһа коронавирус дьаҥар хаптарбытын көрдөрдө.
Ыарыыны бохсор суһал дьаһаллары киллэриигэ, анаалыстары Дьокуускай куоракка тиэрдиигэ, түмүктэри ылыыга улуустааҕы киин балыыһа, улуус дьаһалтатын, нэһилиэк балыыһаларын суоппардара күннэри-түүннэри сүүрэллэр.
Муус устар ыйтан улуустааҕы суһал ыстаапка нэһилиэк дьаһалталара күннэтэ нэһилиэккэ хас киһи кэлбитин, дезинфекция оҥоһуллубутун, сэрэтии үлэтэ төһө ыытыллыбытын отчуоттууллар. Ол курдук, бу нэдиэлэ устатыгар улууска барыта 44 улахан киһи, 32 оҕо кэлбитэ бэлиэтэннэ. Түгэнинэн туһанан, улахан эппиэтинэстээхтик нэһилиэнньэни кытта бииргэ үлэлии олорор Амма, Баайаҕа, Дьүлэй нэһилиэктэрин дьаһалтатыгар махталбытын тиэрдэбит.
Уодаһыннаах дьаҥы бохсон, дойдуларыгар сынньана кэлэр дьоммут болҕомтолоругар иһитиннэрии күн ахсын тиэрдиллэ турар. Ол курдук, дойдуларыгар кэллилэр да булгуччу 14 хонук устатыгар дьиэҕэ хааччахтанан олоруу эрэсиимин тутуһалларыгар соругу туруорабыт. Өскөтүн кыраадыстара таҕыстаҕына, тута, балыыһаҕа эрийэн биллэрэллэригэр төлөпүөннэр ньүөмэрдэрэ ыйыллар.
Доруобай, этэҥҥэ чэгиэн сылдьар туһугар бука бары мааскалаах, бэрчээккилээх сылдьыыны тутуһуоҕуҥ.