Аныгы үйэҕэ түөкүттэр аны “виртуальнай олоххо” көһөннөр, социальнай ситимнэр нөҥүө дьону албыннаан-көлдьүннээн үптэнэр буоллулар. Хомойуох иһин, түөкүттэр угаайыларыгар ордук саастаах дьон киирэн биэрэллэр
edersaas.ru
Онон, кырдьаҕас дьоммут хара санаалаах түөкүттэр илимнэригэр киирэн биэрбэттэрин курдук, эрдэттэн сэрэтии үлэтин ыытыахтаахпыт. «Саха Сирэ» хаһыат «МегаФон» хампаанньаны кытары кыттыгас бырайыагар, бүгүн ол туһунан кэпсэтиэхпит.
Үгүс киһи төлөпүөнүгэр: «Ваш сын в милиции за драку/наезд на человека/убийство. Что будем делать? Открываем дело или…? Никому не звоните. Сейчас дадим трубочку одному человеку…», — диэн хабааннаах СМС иһитиннэриини туппут буолуохтаах. Бу маннык иһитиннэриини тутаат, ордук саастаах өттө оҕолорун быыһыыр сыалтан харчы ыыта охсоллор.
Өссө маннык баар. Баантан “Ваша карта заблокирована”, биитэр өссө эрийэннэр счеккутун ким эрэ алдьатта диэн этэллэр. Бу түгэҥҥэ пластиковай каарта нүөмэрин, ПИН-куодун билбэт киһигитигэр, буолаары буолан, төлөпүөн нөҥүө кимиэхэ да этиллиэ суохтаах. Билбэт нүөмэргитигэр дөкүмүөннэргитин, ааккытын-суолгутун, ханнык аадырыска олороргутун биллэримэҥ.
Билигин аны түөкүттэр Биэнсийэ пуондатын аатыттан дьиэлэри кэрийэ сылдьан, ыйдааҕы биэнсийэҕэ эбии төлөбүр оҥоһулларын туһунан сымыйа сураҕы тарҕаталлар. “Сбербааҥҥа” саҥа каарта оҥорторуҥ, эбии төлөбүр онно түһүөҕэ дииллэр. Манна биири өдйдөнүллүөхтээх. Биэнсийэ пуондатын үлэһиттэрэ хаһан даҕаны ыалы кэрийбэттэр. Өскөтүн мунаарар буоллаххытына, Биэнсийэ пуондатыгар тиийэн наадаҕытын быһаарсыҥ.
Суотабай төлөпүөннээх дьоҥҥо өссө электроннай СМС-тары мобильнай оператор аатынан сирэйдэнэн ыыталлара эмиэ баар. Үгүс өттүгэр тугу эмит рекламалаан, биитэр сүүйүүлээх оонньууга оонньотоору. Маннык ис хоһоонноох иһитиннэриилэргэ итэҕэйэн, төттөрү СМС ыыппат ордук. Өскөтүн эппиэттээтэххэ, биитэр итэҕэйэн харчы уктаххытына, төттөрүтүн хас да бүк ороскуотуран тахсаҕын.
Хаартыска: интэриниэттэн.
Анивера АКИМОВА, edersaas.ru