Полиция кримсводкатыттан көрдөххө, тоҕо эрэ Нерюнгри, Ленскэй, Мииринэй куораттар олохтоохторо түөкүттэр угаайыларыгар ордук элбэхтик түбэһэллэр. Бу да сырыыга суобаһа суох дьон сиэртибэлэринэн Ленскэй куоракка биир, Нерюнгрига икки киһи буолбуттар — түөкүттэргэ харчыларын бэйэлэрэ ыыппыттар.
Ол курдук, Нерюнгри полициятыгар 55 саастаах киһи кэлэн, туох кыһалҕаламмытын кэпсээбит: интэриниэт-сайтка 350 тыһ. солк. сыаналаах гарааһын атыылыырын туһунан биллэрии биэрбитигэр, сотору буолан баран, биир дьахтар эрийэн, гарааһы атыылаһыан баҕарарын туһунан эппит.
Маныаха кини командировкаҕа сылдьарын, ол иһин атыылаһыы-атыылааһын дуогабарын онтон кэллэҕинэ эрэ түһэрсиэхтэрин сөбүн, билигин 50 тыһ. солк. эрдэ төлүүрүгэр, чугастааҕы банкомакка барарыгар көрдөспүт.
Уонна бу киһи хаһан банкомакка тиийиэр диэри дьахтар төлөпүөнүнэн кэпсэтэрин тохтоппотох. Онтон тиийбитигэр, банкомакка тугу, хайдах гыныахтааҕын ыйан-кэрдэн биэрбит, эмсэҕэлээччи ону барытын өс киирбэх толорон испит. Ол түмүгэр, 50 тыһыынча тутуон оннугар, бэйэтиттэн 100 тыһ. солк. харчытын ыыппыт. Түөкүн дьахтар төлөпүөнүн арааран кэбиспит.
Итинник схеманан түөкүннээһин Ленскэйгэ тахсыбыт: 51 саастаах дьахтар биллэриилэр сайтарыгар кыбартыыратын атыылыырын туһунан биллэрии биэрбит. Сотору буолан баран, биир киһи эрийэн, кыбартыыраны атыылаһарын, онуоха 50 тыһ. солк. эрдэ төлүүрүн, ол иһин банкомакка барарыгар көрдөспүт. Дьахтар банкомакка тиийэн, кини тугу этэрин толорон испит.
Онтон «атыылаһааччыта» 14 тыһ. солк. ыытарыгар эппитигэр, дьахтар дьэ уорбалыы санаабыт уонна төлөпүөнүн ууран кэбиспит, каартатын банкоматтан ылбыт. Ол эрээри, кини каартатыгар биллибэт нүөмэрин «мобильнай баана» сыһыарыллыбытын, 4.000 тахса харчыны устубуттарын туһунан смс-иһитиннэриилэр кэлитэлээбиттэр.
Эмиэ Нерюнгрига 50 саастаах киһи ааспыт сыл алтынньытыгар интэриниэтинэн сүһүөхтэри эмтиир БАД атыылаһаары түөкүттэр сиэртибэлэринэн буолбут. Ол табаарын тутан, бу «эмтэрин» иһэ сылдьыбыт да, олох даҕаны туһалаабатаҕын иһин быраҕан кэбиспит.
Онтон муус устарга киниэхэ биир киһи эрийэн, силиэдэбэтэлбин диэбит уонна ити БАД-тары атыылаһан, элбэх киһи албыннаппытын, суут буолбутун, онон киниэхэ суут уурааҕынан 530 тыһ. солк. сууммалаах хоромньу төлөнүөхтээҕин кэпсээбит. Итиэннэ киниэхэ сотору эрийэн, ол харчытын хайдах ылыахтааҕын быһаарыахтара диэбит.
5 мүнүүтэ буолан баран, эдэр киһи эрийэн, РФ Киин баанын коммерческай салаатын үлэһитэбин, ону компенсацияны ыларга, бастаан «на судебные издержки» диэн, 21 тыһ. солк. харчыны, онтон 69 тыһ. солк. нолуок төлүөхтээҕин эппит. Эмсэҕэлээччи саарбахтыы түһэн баран, көрдөөбүт суумаларын ыыппыт.
Онтон хас да күн буолан баран, түөкүн эмиэ эрийэн, баан техническэй биричиинэнэн харчытын ыытар кыаҕа суоҕун, онон сарсыныгар инкассаторскай сулууспа аҕалан биэриэҕин, онно 132 тыһ. солк төлүүр наадатын эппит.
Дьэ, манна эрэ өйдөөбүт, түөкүттэр угаайыларыгар киирэн биэрбитин. Уонна тута полицияҕа барбыт.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.