Бүгүн, ахсынньы 25 күнүгэр, Дьокуускайга 2019 сылтан киирэр бөх реформатын чэрчитинэн тутуллар сыбаалка оҥоһуутун, хомунаалынай инфраструктураны уонна тырааныспар боппуруостарын ырытыстылар.
«Якутскэкосети» ХЭУо генеральнай дириэктэрэ Денис Тон этэринэн, Бүлүүлүүр суолга баар сыбаалка бырайыагын 2018 сыл атырдьах ыйыттан оҥорон саҕалаабыттар. «47 гектар иэннээх сыбаалкаҕа сылга 173 туонна бөх сүөкэнэр. Саҥардыллар сыбаалка тулалыыр эйгэҕэ буортуну оҥорбот, сыты-сымары таһаарбат буолуоҕа«, -диир Денис Тон.
«Эко-Энергия» ХЭУо дириэктэрэ Андрей Хиль бөҕү уматар анал оһохтору туруордахха сыбаалка да наадата суох буолуо диир. Кини бөҕү улахан кыраадыстаах уокка уматар оһохтору туруоран, доруобуйаны уонна тулалыыр эйгэни харыстыахха диэн этии киллэрдэ.
Дьокуускай уопсастыбаннай палататын чилиэнэ Юрий Коркин өрүс пуордун уонна Покровскайдыыр суолу холбуур шоссе оҥорон, массыыналар холкутук айанныыр усулуобуйаларын оҥоруохха диэн этии киллэрдэ.
Мунньах кыттыылаахтара канализация, ардах уута мунньуллар кыһалҕатын, дьиэ тутуутун хаачыстыбатын ырытыстылар.
Николай Попов, «Саха сирэ» хаһыат, edersaas.ru