Суруналыыс Николай Крылов бириэмийэтин лауреаттара билиннилэр...
Кыһа - Олох-дьаһах

Суруналыыс Николай Крылов бириэмийэтин лауреаттара билиннилэр

«Олох суола» хаһыат уопсастыбаннай кэрэспэдьиэннэрин истэригэр суруналыыстыка салаатыгар СӨ Судаарыстыбаннай бириэмийэтин лауреата Николай Крылов 2019 сыллааҕы бириэмийэтин лауреаттара билиннилэр.

Светлана Григорьевна Мытник – Бүлүү куоратыттан төрүттээх, биллэр педагог, убаастанар учуутал. Кини уһулуччулаах тэрийээччи, социальнай эйгэҕэ элбэх идиэйэни, бырайыагы көҕүлээччи.

Светлана Григорьевна уопсастыбаннай кэрэспэдьиэн, Арассыыйа суруналыыстарын Сойуустарын чилиэнэ, 40 сыл устатыгар улуустааҕы “Олох суола” (“Октябрь суола”) хаһыаты кытта үлэлэһэр. Кини бастаан үөрэхтээһин уонна оҕону иитии тиэмэлэрин сырдатыыттан саҕалаабыта, ол кэмҥэ 1№-дээх Орто оскуолаҕа алын кылаастар учууталларынан уонна үөрэх чааһыгар дириэктэри солбуйааччынан үлэлиирэ. Оскуола иһинэн хас да сыл «Олох суола» хаһыат оҕону иитиигэ аналлаах “Кустук” диэн сыһыарыыта тахсыбыта.

1998 сыллаахтан Светлана Григорьевна тэрийбит уонна салайан үлэлэппит Пресс-киинэ 20 сыл устата “Бүлүүтээҕи педколледж” диэн устудьуоннар хаһыаттарын таһаарар, эдэр ыччат боппуруостарын быһаарар, үөрэхтээһиҥҥэ уопуттаах үлэһиттэр сабыдыалларын сырдатар теле-биэриилэри бэлэмнииллэр.

Бүлүүтээҕи «Панорама» диэн телестудия тэриллиэҕиттэн “Саха” көрдөрөр-иһитиннэрэр хампаанньатын кытта бииргэ үлэлэһэр. Кини Бүлүү улууһугар «Переменка» уонна «Альянс» диэн оҕо бастакы телестудияларын тэрийээччи уонна салайааччы.

Светлана Григорьевна Бүлүүтээҕи педкэллиэс устудьуоннарын Индияҕа, Калмыкияҕа, Тываҕа, Москубаҕа, Санкт-Петербурга, Чебоксарыга, Саратовка сылдьыбыт педэкспедицияларын матырыйаалларынан ааптарыскай теле-биэриилэрэ ураты болҕомтону ылаллар.

Фото-суруналыыс быһыытынан үлэлэрэ эмиэ кэрэхсэбили ылар. Хас биирдии бырайыак, тас дойдуга сырыы, бэлиэ күн кэнниттэн кини фотоэкспозиция оҥорор.


Юлия Петрова, Бүлүүтээҕи И.Л.Кондаков аатынан гимназия 11-с кылааһын үөрэнээччитэ, «Репортер» диэн медиа-кииҥҥэ сылдьар (сал. К.В.Дорофеева), 2015 сыллаахтан «Репортер» оҕо хаһыатын эрэдээктэрэ. Юлия эрэдээктэр быһыытынан аһаҕас уонна эппиэтинэстээх үлэһит. 2017 сыллаахха олунньуга «Репортер» пресс-киин «Медиашкола» диэн улуустааҕы эдэр кэрэспэдьиэннэр медиафорумнарыгар бастаабыта. Юлия медиафорумҥа билиһиннэрбит «Куорат уулуссалара» бырайыага «Дьулуур» оҕо хамсааһынын тэрилтэтин өрөспүүбүлүкэ иһинээҕи мустуутун кэмигэр ыытыллар социальнай бырайыактар күрэхтэригэр кыттарга ыытыллыбыта. Ол түмүгэр ити бырайыак 2017 сыллаахха оҕо хамсааһынын тэрилтэтин сайдыытыгар анаммыт СӨ баһылыгын Гранын күрэҕэр «Я – рыцарь пера» диэн номинацияҕа кыайбыта. «PROFIT & SELFSUPPORT» диэн Юлия оҥорбут биисинэс-бырайыага 2019 сылга улуустааҕы «Инникигэ хардыы» НПК-ҕа бириистээх миэстэҕэ тиксибитэ.

Ити курдук, Юлия киэҥ билиилээх суруксут, актыыбынай кэрэспэдьиэн, кини суруйбут матырыйааллара өрөспүүбүлүкэ да, улуус да хаһыаттарыгар үгүстүк тахсаллар.

 

“Олох суола” хаһыат эрэдээксийэтэ, СӨ Суруналыыстарын сойууһун бастакы сүһүөх тэрилтэтэ

1
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

7 − шесть =