Эрдэ иһитиннэрбиппит курдук, алтынньы 14 күнүгэр Уус Алдан улууһун Суотту сэлиэнньэтигэр (Оҕуруоттаахха) итирик суоппар буруйунан, оскуола оҕолоро эмсэҕэлээбиттэрэ – биир уолчаан сырдык тыына быстыбыта, биэс оҕо араас эчэйиини ылбыта.
Бу чахчынан РФ Холуобунай кодексатын 264-с ыст. 4-с чааһынан, ол эбэтэр, суол быраабылатын кэһии түмүгэр, итирик туруктаах сылдьан, киһини сэрэҕэ суохтан өлүүгэ тиэрдии бэлиэтэ баарынан, холуобунай дьыала тэриллибитэ.
Дьыаланы РФ Силиэстийэлиир кэмитиэтин Саха сиринээҕи управлениетын Чурапчытааҕы салаата силиэстийэлиир.
Дьыала хаамыыта СӨ Борокуратууратын хонтуруолугар сылдьар.
РФ Силиэстийэлиир кэмитиэтин Саха сиринээҕи управлениетын салайааччытын сонуннары киэҥник тарҕатар ситимнэри кытта үлэҕэ ыстаарсай көмөлөһөөччүтэ Надежда Дворецкая:
– Бу билигин аҕай Уус Алдан оройуоннааҕы суута алтынньы 14 күнүгэр оҕо өлүүлээх суол быһылаанын таһаарыыга уорбаланааччыны силиэстийэ кэмигэр Дьокуускайдааҕы Силиэстийэлиир изоляторга хаайарга быһаарда.
Вера МАКАРОВА, «Саха сирэ» хаһыат, edersaas.ru
Хаартыска: СӨ ИДьМ-тын пресс-сулууспата.