Кыһыҥҥы суолунан таһаҕаһы тиэйии былаана аһары туолла

Бөлөххө киир:

Саха сиригэр массыына  кыһыҥҥы суолунан таһаҕаһы тиэйии былаана 105% туолбут. Бу туһунан муус устар 24 күнүгэр СӨ нэһилиэнньэтин олоҕо-дьаһаҕа куттала суох буолуутун хааччыйар судаарыстыбаннай кэмитиэт бэрэссэдээтэлэ Юрий Зайцев Ил Түмэн дьокутааттарын иннигэр бырабыыталыстыбаннай чааска иһитиннэрдэ.

edersaas.ru

Уһук хоту улуустарга таһаҕаһы тиэйии 309,7 туонна былааннаммытыттан 314,7 туонна тиэйиллибит. Ол иһигэр таас чох, ньиэп, газокондесат уонна «Туймаада-Агроснаб» хайысхатынан 4,1 туонна бородуукта, хортуоппуй, оҕуруот аһа тиксэриллибит.

Юрий Зайцев этэринэн, кутталлаах таһаҕаһы тиэйэр массыына, аҕыйах туонналаах бородууксуйаны таһар тырааныспар тиийбэтинэн, хойуу хаар тибиитинэн, муус чараас буолан кыһыҥҥы суол хойут аһыллыбытынан кэккэ ыарахаттар үөскүү сылдьыбыттар.

Бырабыыталыстыба ити боппуруоһу тус хонтуруолга ылан, эбии тимир көлө биэрэн, суолга тиэхэньикэни көрөөччүлэр күнүстэри-түүннэри дьуһуурустубалаан, былаан кыраапык быһыытынан туолбут.

Сахабыт сирин тус хоту сытар кытыы улуустарын социальнай хайысхалаах табаарынан толору хааччыйарга бары күүһү түмэн үлэлээбит дьоҥҥо кини махталын биллэрдэ.

Марианна Тыртыкова, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0