Сунтаар улууһун Уһун Күөл нэһилиэгин олохтоохторо: «Ээ били Ээдьик дуо?»диэн сэҥээрэ түһэр киһилэрэ, ыраах айан суоппара Эдуард Еремеев бэрт интэриэһинэй саҥа кинигэтин биир дойдулаахтара Дьокуускайга анаан көрсөн сүрэхтээтилэр.
edersaas.ru
«Бүлүү өрүскэ Сунтаар сэлиэнньэтиттэн өрө өксөйдөххө Илин-Дьэли үрэх тус соҕурууттан тардыыланан кэлэн түһэр. Үөһээҥҥи уҥа салаата Сэргэлээх үрэҕэ диэн ааттанан баранар баһа улахан өрүскэ-Өлүөнэҕэ түһэр Өргөдьөй үрэҕин баһын диэки тахсан ыйанар… Улахан үрэх аҥаардас хаҥас салаалара: Бэс үрэҕэ, Тоҥус үрэҕэ, Харыйа, Доҕооной, Бочооной уонна Батар диэн үрэхтэргэ былыр-былыргыттан, инньэ Екатерина Вторая ыраахтааҕы саҕаттан, Хочо улууһун баайдара сүөһүлэрин, сылгыларын үүрэн таһааран кыстатар, сайылатар даҕаны эбиттэр. Ити иннинээҕи кэмнэргэ өрө турууну салайбыт Салават Юлаев уолаттарын ыраахтааҕы Екатерина Вторая ыйааҕынан башкир-татардары көскө ыыталаабыттара син өр кэмҥэ Бочоонойго олохсуйбуттара биллэр. Татаар айаана, Курас-Кураш … диэн сирдэр ааттара билигин даҕаны оччотооҕу кэмнэри туоһулааннар аат буолан иҥэн баччаҕа тиийэн кэлбиттэр», — ити курдук киэҥ Арассыыйа остуоруйатыттан кып кыратык кыбытык киллэрэн, Сунтаар оройуонун Уһун-Күөлүн сорсуннаах булчуттарын, тимир көлөнү муоһалаан, сырыы бөҕөнү сылдьыбыт уһун айан суоппардарын тустарынан «Элэс гынан ааспыт эридьиэстээх сырыыларбыттан» диэн батсаап ситимининэн сэргии аахпыт кэпсээннэрбит кинигэҕэ түмүллэн киирдилэр.
Дьоро тэрээһини Эдуард Еремеев-Ээдьик биир дойдулаахтара, Дьокуускай куоракка олохсуйан олорор дьон, сүрүннээн «Хочо Арыылааҕын Түмэр сүбэтэ» биир дойдулаахтар түмсүүлэрэ көҕүлээн, тэрийэн ыыттылар.
Бэркэ ахтыспыт дьон быһыытынан, үүттээх чэйи иһэ-иһэ, ирэ-хоро кэпсэттилэр, сылаас алаадьынан үссэнэн, истиҥник сайа сэлэстилэр.
Кинигэ ааптара бэйэтэ бэлиэтээбитинии: «Дэриэбинэ киһитэ кыратык «пиардана» түстэрбин да, кырдьыы кыраныыссатыгар чугаһаан иһэн, элбэх үтүө тыллары иһиттим», — диэн эрдийэ түстэ. Кырдьыга да, биир дойдулаахпыт булт, айан-сырыы мүччүргэннээх түгэннэрин бэркэ суруйан, ааҕааччыларга бэртээхэй бэлэҕи утары уунна. Онон суруйар дьоҕурдаах дьон нэһилиэк олоҕун ааспыт кэмнэрин, киһи сэргиир-сэҥээрэр түгэннэрин түмэн, кинигэ оҥорон таһаараллара хайҕаллаах суол.
Суруллубут — суоруллубат. Онон атын да улуустарга олорор тыа сирин дьонун биир дойдулаахпыт Эдуард Еремеев, биһиги Ээдьикпит курдук бэртээхэй кинигэлэри бэлэмнээн таһаарыҥ, диэн ыҥырабын.
Венера СТЕПАНОВА,
Ньурба улууһун, Күндээдэ нэһилиэгэ.
«Саха сирэ» хаһыат, edersaas.ru