Сунтаар улууһун аҕа баһылыга Анатолий Григорьев Дьокуускайга олорор суруналыыстары түмэр үгэскэ кубулуйбут түһүлгэтэ быйыл бэһис төгүлүн ыытылынна.
edersaas.ru
Манна 22 суруналыыс кэлэн улуус сайдыытын, үлэтин туһунан ирэ-хоро кэпсэтэн, санаа атастаһан дьоро күн олус истиҥник ааста. Биэс сыл устата куоракка олорон улуустарын сырдатыыга үлэлэһэр суруналыыстарга грант олохтонор. Бу сырыыга түөрт киһи ылла: «Саха» НКИХ үлэһитэ Елизавета Егорова, «Сахамедиа» суруналыыһа Анивера Акимова, «Ситим-медиа» суруналыыһа Туйаара Сиккиэр уонна Маргарита Винокурова.
Бу суруналыыстар 2019 сыл устата Сунтаар уонна улуус дьонун сырдатар матырыйааллары таһааран дойдубутун элбэхтэ ааттаттылар. Эҕэрдэ! Дьоро күнү «Сахамедиа» кыргыттара Анивера Акимова, Надежда Егорова-Намылы, Ангелина Васильева-Дайыына иилээн-саҕалаан тэрийдилэр.
Ырыа кэрэ кэһиилээх Иван Иванов, Анна Тотонова, Екатерина Григорьева ыалдьыттаатылар.
Мария Кобельянова-Тускулаана,
edersaas.ru