Сунтаар улууһугар гражданскай көҕүлээһин сыла ситиһиилээхтик түмүктэннэ. Ону даҕаспытынан, Тыа сирин үлэһиттэрин сыла биллэрилиннэ.
Өрөспүүбүлүкэҕэ бастакынан Сунтаар улууһа 2016 сылы Гражданскай көҕүлээһин сылынан биллэрбитэ. Сыл устата дьон-норуот көҕүлээһинин, ыра санаатын олоххо киллэрэн, элбэх үлэ ыытылынна.
Ангелина Васильева, «Саха сирэ» хаһыат, https://edersaas.ru/
Гражданскай көҕүлээһин сылын бастакы аанын аһар улахан тэрээһин — кулун тутар ый саҥатыгар “Гражданские инициативы – основа успешного развития территорий” диэн ааттаах коммерческайа суох түмсүүлэр форумнара Сунтаарга кииннээн ыытыллыбыта. Манна Бүлүү, Ньурба, Үөһээ Бүлүү, Мииринэй, Ленскэй, Өлүөхүмэ улуустарын уонна СӨ Гражданскай көҕүлээһинин сайыннарыы департаменын кытта үс өрүттээх Сөбүлэһиигэ илии баттаммыта.
Сунтаар улууһугар барыта 187 уопсастыбаннай тэрилтэ үлэлиир. Итилэртэн 22 түмсүү СӨ юстициятын министиэристибэтин судаарыстыбаннай регистрациятын ааспыта.
Улууска Гражданскай көҕүлээһин сылыгар туһуламмыт кэскиллээх үлэ нэһилиэктэринэн, тэрилтэлэринэн, уопсастыбаннай түмсүүлэринэн, биирдиилээн дьоҥҥо ыытылынна. Бу сыл чэрчитинэн улуус бүддьүөтүттэн 1 мөл. 700 тыһ. солк. тыыран, уопсастыбаннай уонна коммерческайа суох түмсүүлэргэ грант быһыытынан көрүллүбүтэ. Ону тэҥэ Гражданскай уопсастыба институттарын сайыннарыы министиэристибэтин куонкуруһугар кыттан, 1,5 мөл. солк. ылан, үтүө көҕүлээһиннээх дьон улуус сайдыытыгар туһуламмыт бырайыактара олоххо киирэригэр төһүү күүс буолла. Ол курдук 30-тан тахса бырайыак үбүлэннэ. Холобур, Сунтаар сэлиэнньэтигэр куйаары, сир баайын кэпсиир бастакы планетарий тутулунна. Бу алгысчыт Августина Яковлева бырайыага.
Сыл устата сыал-сорук патриотическай иитииттэн саҕалаан, дьон олоҕун тупсарар аналлаах, социальнай хайысхалаах уопсастыбаннай түмсүүлэр үлэлэрин күүһүрдэргэ туһуламмыта. Бары нэһилиэктэргэ тупсаран оҥорууга, ыраастааһыҥҥа, о.д.а. куонкурустар ыытыллыбыттара, оҕо былаһааккалара тутуллубуттара.
Ахсынньы 20 күнүгэр Гражданскай көҕүлээһин сылын түмүктүүр үөрүүлээх тэрээһин буолан ааспыта. Манна “Сыл бастыҥ уопсастыбаннай лиидэрэ”, “Бастыҥ уопсастыбаннай түмсүү”, “Бастыҥ уопсастыбаннай тэрилтэ”, “Сыл бастыҥ нэһилиэгэ”, “Сыл бастыҥ баһылыга” диэн анал ааттарга биэстии киһини, тэрилтэни талбыттара.
2017 сыл Сунтаар улууһугар Тыа сирин үлэһиттэрин сылынан биллэрилиннэ. Онон үлэһит дьон өрө тутуллан, дойдулара туругурарын туһугар анаабыт сыралара сыаналаныа диэн эрэнэбит.
Ангелина Васильева, «Саха сирэ» хаһыат, https://edersaas.ru/