Сайтпытыгар бэҕэһээ, ыам ыйын 12 күнгэр, Сунтаар сэлиэнньэтигэр киһи өлүүлээх суол быһылаана тахсыбытын иһитиннэрбиппит. Онно икки кыыс эмсэҕэлээбититтэн биирэ тута миэстэтигэр тыына быстыбытын, иккиһэ балыыһаҕа ыарахан туруктааҕын суруйбуппут. Оттон бүгүн аны бу улуус Илимниир сэлиэнньэтигэр эмиэ эдэр киһи өлүүлээх суол быһылаана тахсыбытын туһунан СӨ ИДьМ-тын Госавтоинспекциятын управлениета иһитиннэрдэ.
Ол курдук, бу сарсыарда 06.00 чаас саҕана Сунтаар улууһун полициятын дьуһуурунай чааһыгар Илимниир сэлиэнньэтигэр суол быһылаана тахсыбытын, онно эдэр киһи суорума суолламмытын туһунан иһитиннэрии киирбит.
Барыллаан быһаарыынан, 29 саастаах киһи «Сузуки Эскудо» массыынатын ыытан иһэн, уруулун кыайан салайбакка, суолтан туораан, түҥнэстибит.
Ол түмүгэр, суоппар «суһал көмө» биригээдэтэ кэлиэр диэри тыына быстаахтаабыт…
Бу эрэйдээх массыына ыытар быраабы былырыын саас ылбыт, кэргэннээх, үс оҕолоох эбит…
Быһылаан тахсыбыт сирэ — 5 м туоралаах көнө гравий суол.
Дьыала матырыйааллара силиэстийэ уорганнарыгар ыытыллыбыттар.
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын Госавтоинспекциятын управлениета.