Сунтаар улууһугар тутуу үлэтэ хайдах барарын туһунан улуустааҕы тутуу комплексын управлениетын начаалынньыга Иван Егоровы кытары кэпсэттибит.
– «Демография» национальнай бырайыак чэрчитинэн Сунтаар нэһилиэгин РТС оройуонугар 240 миэстэлээх оҕо уһуйаана тутулла турар. Үлэни «Кинг-95» тэрилтэ ыытар. Оҕо уһуйаанын бырайыагын «Легион-проект» ХЭУо 3 этээстээх таас барыйааннаах гына оҥорбут. Былаан быһыытынан эбийиэк быйыл ахсынньы ыйга бүтүөхтээх. Манна үксэ бэйэбит сахабыт дьоно үлэлии-хамсыы сылдьаллар. Өссө Күндэйэҕэ эмиэ 50 миэстэлээх оҕо уһуйаана тутуллуохтаах. Бу эбийиэк билиҥҥитэ улуус бүддьүөтүн харчытынан тутулла турар. Онно сыбаайатын түһэрии эҥин үлэтэ киирэр. Билиҥҥитэ сыбаайата түһэн турар. Онтон Кириэстээх нэһилиэгэр 120 миэстэлээх оскуола дьиэтэ тутуллар.
Сунтаар нэһилиэгин Абаҕа микрооройуонугар култуурунай-спортивнай комплекс тутулла турар. Илимниир нэһилиэгэр култуурунай-спортивнай комплексы тутарга наадалаах үп көрүлүннэ. Манна үлэ барыаҕа. Сиэйэ нэһилиэгэр многофункциональнай култуура уонна успуорт киинэ тутуллар буолла. Билиҥҥитэ онно тимир каркаһа турда. Ааспыт сылга улууспут хас да оскуолатыгар өрөмүөн үлэлэрэ бардылар. Эдэр исписэлиистэри олорор дьиэнэн хааччыйыыга үлэ эмиэ барар. Ол курдук, Кэмпэндээйигэ кинилэргэ анаан түөрт кыбартыыралаах дьиэ тутуллан бүтэн эрэр.
“Развитие муниципальных автомобильных дорог и муниципального транспорта 2020-2024 г.г.» диэн улуустааҕы тустаах бырагыраама иһинэн Хордоҕойго барар суол тутулла сылдьар. Бу күннэргэ онно Агдаары үрэҕин туоруур муоста тутуллан түмүктэнэн эрэр. Маны тутарга ааспыт сылга 54 мөл. 589 тыһ. суумалаах муниципальнай хантараак баттаммыта. Өрөспүүбүлүкэбит тэриллибитэ 100 сылын көрсө улууспут киинигэр Матвей Евсеев салайар «Арктик капитал» тэрилтэтэ уонна улуус бэйэтэ үбүлээн 350 миэстэлээх С.А.Зверев-Кыыл Уола аатынан Духуобунай киин тутуллан силигэ ситэн эрэр. Былаан быһыытынан бу сайын, ыһыахха үлэҕэ киириэхтээх. Аҕа дойду Улуу сэриитигэр Кыайыы 75 сыллаах үбүлүөйүн көрсө улууспут киинигэр Албан аат болуоссата тутулла турар. Бу эбийиэк дьиҥ суолтата диэн олус киэҥ. Ол курдук, дойдубут устуоруйатыгар буолан ааспыт бары сэриилэргэ (Аҕа дойду сэриитигэр, Афганистан уонна Чечня) кыттыбыт бэтэрээннэргэ, дьоҥҥо ананар. Ону сэргэ тыылга кыайыыны уһансыбыттарга эмиэ.
Хаарбах дьиэттэн дьону көһөрүү бырагыраама чэрчитинэн дьиэлэр Сунтаарга, Илимнииргэ уонна Кутанаҕа тутулла тураллар. Өрөспүүбүлүкэбитигэр коронавирус дьаҥа туран, улууспутугар барар тутуу үлэтигэр атын сиртэн кэлбит дьон баар дуу, суох дуу диэн оруннаах боппуруос турар. Кырдьык, кэлии дьон бааллар. Ол эрэн, кинилэр бары ыарыы тура илигинэ кэлэн, бары бэрэбиэркэлэри ааһан үлэлии-хамсыы сылдьаллар. Онон кинилэр өттүлэриттэн ханнык да куттал суох. Өссө төгүл хатылаан этэбин, үлэ бара турар эбийиэктэригэр сүрүннээн бэйэбит дьоммут үлэлииллэр. Кэккэ биричиинэнэн сорох эбийиэктэргэ билиҥҥитэ үлэ барбат. Ол сотору көнүөҕэр эрэллээхпит.
Кэпсэттэ Гаврил АНДРЕЕВ