Сунтаардар Олоҥхо ыһыаҕар сырыттыбыт

Бөлөххө киир:

Сунтаар улууһуттан Олоҥхо ыһыаҕар 130 киһи буолан кыттан, улаханнык астынныбыт, үөрдүбүт. 

Кырылас кумахтаах Бүлүү ыалдьыты көрсөр аартыктан саҕалаан моҕол, туос ураһалара, түһүлгэ аайы саҥаттан саҥа көстүүлээх тутуулара,  Дьааҥыга турбут холоонноох Аал Луук Маһа, уустар түһүлгэлэрэ олуһун сөхтөрдө.
Ыһыах арыллыытыгар эр дьоннор үс  көмүс бүтэйи оҥорбуттара, бар дьон олоҥхо ситимин олохтообуттара, хомус бэлиэлэрин өрө тутан ойуулаабыттара, олоҥхоһуттара Харатаайабы уруйдаан улахан айымньытын толорбуттара, оҕо дьон олоҥхолоон омолуйбуттара, Кыыс бухатыырдар күөн көрсүбүттэрэ, ыһыах кылыһахтаах алгыһа, улахан киһилэрин М.Н.Жирковы өрөгөйдөөбүттэрэ барыта олус кэрэ этэ…

Сунтаар дьонун бу үөрүүлээх түһүлгэҕэ үөрэ-көтө, олус истиҥник уонна бэйэ дьонунуу чугастык Алексей Васильев баһылыктаах Халбаакы  нэһилиэгэ көрүстэ. Икки күн устата сүүстэн тахса киһилээх дэлэгээссийэни маанылаата-күндүлээтэ. Ол да иһин астына-махтана улууспут аҕа баһылыга Анатолий Григорьев Сунтаар бастыҥ ууһун анабыл быһаҕын, «Сунтаар — олоҥхо дойдута» диэн көмүс сериятын бэлэх уунна. Салгыы бачча элбэх киһини куратор быһыытынан эппиэкэ үлэһитэ Екатерина Бакарова  арыаллаан сырытыннарда.

Сунтаардар бу ытык күҥҥэ бары күрэскэ холоннубут, үгүс тэрээһиҥҥэ көхтөөх кыттыыны ыллыбыт. Ол курдук, биһиги ситиһиилэрбит:

«Улуу олоҥхоҕо» эдэр ыччакка ыытыллыбыт күрэскэ «Кылаан олоҥхоһут» аатын Айсен Федоров сүктэ.
Олоҥхону бөлөҕүнэн толорууга улууспут бас-көс дьонун «Олоҥхо оһуора» бөлөҕө (сал. Никандр Тимофеев) «Олоҥхо түһүлгэтин бастыҥ толорооччулара»  үрдүк ааты ылла. Туруорууга бухатыыр оруолун Сбербаан Сунтаардааҕы салаатын өр кэмҥэ салайбыт  бочуоттаах салайааччыта Егор Тимофеев,  Сайбарыын эмээхситтэри КСП хотуна Ксения Семенова, Култуура салалтатын кылаабынай буҕаалтыра Наталья Эконова, бухатыыр аҕатын Үөрэҕирии салалтатын салайааччы Гаврил Еремеев,  чыычаах оруолун улуус кылаабынай бырааһа Светлана Иванова, абааһы кыыһын эппиэкэ салайааччыта Оксана Еремеева, абааһы уолун «Урожай» спортивнай уопсастыба салайааччыта Дмитрий Спиридонов,  Аалыы Кыыдаан кыыс Бухатыыры култуура хотуна Мария Кобельянова толордулар.


Улахан дьоҥҥо  Элгээйиттэн Изабелла Макарова — Толоон Туорааҕа «Кылыһахтаах ырыалаах» анал ааты ылла.
Кэскиллээх олоҥхоһуппут Бордоҥтон Сережа Яковлев  улуу олоҥхоҕо холонон Туоһу сурук тутта.

Өбүгэ оонньууларыгар Кутана  күүстээх бөҕөһө, мадьыныта Рустам Ксенофонтов төрдүс төгүлүн кыайыылаах үрдүк аатын ылан, биир дойдулаахтарын, элбэх көрөөччүлэри, ыалдьааччылары үөртэ!

«Дьөһөгөй оҕотун маанылаах симэҕэр»  Кутанаттан «Ситии» түмсүү (сал. Валентина Дьячковская) «Кылаан»  аатын ылан, 50.000 солкуобайынан наҕараадаланна.
«Сарыал» түмсүүбүт (сал. Альбина Федорова) үһүс миэстэ буолан, 10.000 солк. бириистэннилэр.

Саха таҥаһыгар «Сунтаар ситимэ»  түмсүү (сал. Антонина Кириллина) үс араас саха таҥаһын бөлөҕүнэн көрдөрөн «Кылаан» аатын сүгэн, 30.000 солк. наҕараадаланнылар.

«ЛИДИЯ» ателье (сал. Лидия ФЕДОРОВА) аныгы саха таҥаһыгар 3-с миэстэни ылан, 10.000 солк. тутта.
Дьиэ кэргэн сахалыы таҥаһыгар Сунтаартан Ньургууна, Аркадий Ивановтар  3-с бириистээх миэстэҕэ тигистилэр. Ону кытта, улуус дьокутааттарын Сэбиэтин бэрэссэдээтэлэ Михаил Максимов кэргэнэ Евдокиялыын анал аат ылан, 5000 солк. наҕараадаланнылар (Сунтаар ыһыаҕар баһылыктар, улуус дьокутааттарын сэбиэтин бэрэссэдээтэлэ толору сахалыы таҥаһынан кыттаннар, дьон биһирэбилин ылбыттара, оттон Максимовтар дьиэ кэргэн бастыҥынан ааттаммыттара).

Оһуохайга Тойбохойтон Далбар этээччибит Лилия Михайлова бастаата, Туймаада ыһыаҕар эмиэ  бастыҥ этээччи буолан кэлбитэ. Киниэхэ икки бүк эҕэрдэ! Оҕо этээччигэ бастакытын холонон улууһугар бастыҥ ааты ылбыт Маар Күөлтэн Виолетта Петрова  кэрэ-намыын куолаһынан кыайыылаах аатын ылан, Сочига барар путевканан наҕараадаланна. Сиэйэттэн Марина Хомподоева сиэдэрэй үҥкүүтүнэн 3-с миэстэ буолла. Оһуохайбыт түмсүүтүн салайааччыта Саргылана Меркурьева былырыыҥҥы Дархан этээччи анабыл бирииһин тутта. Элгээйиттэн кэскиллээх этээччи Евдокия Захарова-Максимова  диплом ылла.

«Уран ууска» уолаттарбыт бары өттүнэн дэгиттэрдэрин көрдөрдүлэр. Василий Уаров саха быһаҕын күөн күрэһигэр бастаата,  хомуһу уһаныыга иккистээтэ, онон Кылыадьы Уус анал бирииһин тутта. Бордоҥтон Кирилл Петров батыйаҕа, ох сааҕа иккис миэстэлэри,  быһахха, хомуска төрдүһү ылары ситистэ. Егор Тартаков хомуска «Ыллыыр хомустаах уус»анал ааты сүктэ. Күүкэйтэн Дмитрий Николаев хомуска анал аат ылла. Саҥа холонор уус Михаил Никитин быһаҕа бастыҥнар ааттарыгар киирдэ. Мас оҥоһуктарга маһы ыллатар ууспут Иннокентий Иванов  үһүс миэстэҕэ тахсан,  10.000 солк. наҕараадаланна.

«Олоҥхо дойдутун талыы-талба ыччата»  күрэскэ Москубаҕа үөрэнэр ыччаттарбыт Сандаара Иванова уонна Дьулус Николаев бары өттүнэн талааннаахтарын бар дьоҥҥо көрдөрөн, «Бастыҥ паара» аатын ылары ситистилэр. Хомуска  Сунтаартан Андрей Федоров (сал. Тамара Спиридонова) «Кэскиллээх толорооччу» анал ааты сүктэ. Надежда Петрова кыттан Туоһу сурук тутта. Тойукка Михаил Евсеев-Кураһаай Мэхээлэ «Ураты кылыһах» диэн ааты ылан, салгыы куоракка ыытыллар Аан Дархан түһүлгэтигэр холоно барда. Айсен Федоров  тойукка иккистээтэ. Туяра Алексееваҕа анал аат туттарылынна.

Уран уустар быыстапкаларыгар кутаналар, бүлүүчээннэр кыттаннар, «СИТИИ» түмсүү «Кыл сиэл» анал ааты, оҕуруоҕа, кыбытык тигиигэ бастааннар, 20000 солк. наҕараадаланнылар. Кутанаттан эдэр иистэнньэҥ Саргылаана Никифорова оҕуруонан тигиигэ 2-с миэстэ буолан, 20.000 тутта. Бүлүүчээнтэн «Саха саргыта» түмсүү сиэлгэ 2-с миэстэни ылан, 15.000 тутта.

Дэгэрэҥ ырыаҕа Тойбохойтон «Дуораан» ансаамбыл (сал. Александра Титова)  Туоһу сурук тутар чиэскэ тигистэ. Поэзия күрэҕэр Элгээйиттэн Изабелла Макарова-Туос Туорааҕа  биһирэбил ылла. Байаанынан  үҥкүүгэ Тойбохойтон киэн туттар киһибит Клара Тихонова Бүлүү баянистарын кытта бииргэ  оонньооннор ыһыаҕы олуһун киэргэттилэр.

Бу тэрээһиҥҥэ Сунтаартан тоҕус уоннарыгар чугаһаабыт кырдьаҕастар Маарыйа Чокурова уонна  Дьөгүөр Нилов  ытык-мааны ыалдьыт буолбуттара, Бүлүү олоҥхотун ыһыаҕын биһиги санаабытыгар ситэрэн-хоторон биэрэргэ дылы буоллулар.

Дьэ ити курдук, бары тэрээһиҥҥэ холонон, кыайыы-хотуу көтөллөнөн «Олоҥхо ыһыаҕар сырыттыбыт»  диэн астынныбыт. Бу айаҥҥа, тэрээһиҥҥэ күүс-көмө буолбут дьоммутугар, баһылыкпытыгар А.В.Григорьевка, баһылыгы солбуйааччы У.Д.Поповаҕа, баһылыгы бастакы солбуйааччы Н.П.Александровка тимир көлөнөн көмө буолбут РСДЮСШОР салайааччыта Д.А.Даниловка, оптуобус  суоппарыгар Вячеслав Григорьевка уонна да атыттарга махталбытын тириэрдэбит.

БИҺИГИ,  СУНТААРДАР, ОЛОҤХО ЫҺЫАҔАР СЫЛДЬАН, УЛУУ ОЛОҤХОНУ УРУЙДААТЫБЫТ, ЫТЫК-МААНЫ ЫҺЫАҔЫ АЙХАЛЛААТЫБЫТ!

Мария КОБЕЛЬЯНОВА—Тускулаана, улуустааҕы култуура салаатын салайааччыта.

+1
0
+1
0
+1
0
+1
0
+1
0
+1
0
+1
0