Сунтаардар коронавирус тула кэпсэттилэр

СӨ Ил Дарханын кулун тутар 17 күннээх 1055 №-дээх ыйааҕыгар «О введении режима повышенной готовности на территории Республики Саха (Якутия) и мерах по противодействию распространению новой коронавирусной инфекции (COVID-19)» олоҕуран,   улуус иһинэн бары үөрэх кыһаларыгар уонна эбии үөрэхтээһин тэрилтэлэригэр кулун тутар 18 күнүттэн 27-гэр  диэри каникул биллэриллибитэ. Онтон  салгыы дистанционнай үөрэтээһиҥҥэ көһөрүү биллэрилиннэ. Улууска  маассабай тэрээһиннэр тохтууллара быһаарылынна. Улуустааҕы оперативнай штаб чилиэннэрэ коронавирус  утары сэрэтии уонна бэлэмнэнии үлэтин ыыталлар. Дьокуускай куоракка орто үөрэх кыһаларыгар үөрэх хаамыыта тохтоон, устудьуоннары уопсайтан таһаарыыга бирикээс тахсыбытыгар МУП АТП тэрилтэ нөҥүө чэпчэтиилээх сыананан биһиги улуустан сылдьар устудьуоннары дойдуларыгар аҕалыыга дьаһал бэрилиннэ.

Каникул кэмигэр оскуола оҕолоро уопсастыбаннай миэстэлэргэ сылдьыыларыгар төрөппүт өттүттэн күүстээх хонтуруол баар буолуохтааҕын бэлиэтээтилэр. Нэһилиэнньэни эминэн хааччыйааһын боппуруоһун көтөхтүлэр, онно  мааска боппуруоһун таарыйдылар. Аптекалар салайааччылара бүтүн Арассыыйа үрдүнэн мааскалар суохтарын ыйдылар, ыарыыттан харыстанарга матырыйаал ылан бэйэ оҥосторго сүбэлээтилэр. Куйаар нөҥүө, ол эбэтэр батсаап  уонна инстаграм ситиминэн тарҕатыллар сурахтар сорохторо кырдьыга уонна толору ситэтэ суохтарынан сибээстээн дьиҥ чахчы туоһуламмыт иһитиннэриини  Роспотребнадзор саайтыттан билсэргитин ыҥырдылар.

Сунтаар улууһун дьаһалтатын пресс-сулууспата