Сунтаар улууһун нэһилиэктэригэр Саха Өрөспүүбүлүкэтин бырабыыталыстыбата 2018 сыллаах үлэтин салгыы отчуоттуур.
Ол курдук, СӨ тас сибээс уонна норуоттар дьыалаларын миниистирэ Гаврил Кириллин салайааччылаах бастакы бөлөх олунньу 6 күнүгэр Тэҥкэ, Бордоҥ уонна Илимниир нэһилиэктэригэр отчуоту туруорда. Бу бөлөххө СӨ экология, айылҕаны туһаныы уонна ойуур хаһаайыстыбатын миниистирин бастакы солбуйааччы Семен Яковлев, архитектура уонна куоракка тутууну ыытыы управлениетын салайааччыта Ирина Алексеева уонна Сунтаар улууһун баһылыга Анатолий Григорьев, улуус тэрилтэлэрин салайааччылара сырыттылар.
Бордоҥҥо уонна Илимнииргэ отчуоттуур бөлөххө «ОДьКХ» ГУТ генеральнай дириэктэрин солбуйааччы Владимир Иванов кыттыыны ылла.
Бу күн даҕаны, экология, доруобуйа харыстабылын, тыа хаһаайыстыбатыгар, чуолаан, үүт сыанатын үрдэтии боппуруостара турдулар. Аныгы кэм ирдэбилинэн цифровой технологияларга, информатизацияҕа элбэх боппуруос киирдэ. Ол курдук, Тэҥкэ нэһилиэгэр суотабай сибээс киириитин уонна цифровой тэлэбиидэнньэни күүскэ туруорустулар. Оттон Бордоҥҥо, Илимнииргэ — ВОЛС линиятыгар холбонуу, цифровой тэлэбиидэнньэҕэ «Саха» НКИХ киллэрии. Олохтоохтор Тэҥкэҕэ култуурунай-спортивнай комплекс, Бордоҥҥо уонна Илимнииргэ култуура кииннэрин тутууну туруорсаллар.
Үс нэһилиэк олохтоохторо Саха Өрөспүүбүлүкэтин бырабыыталыстыбатын ааспыт сыллааҕы үлэтин «биһириибит» диэн сыаналаатылар.
Илимнииргэ отчуот кэннэ Гаврил Витальевич, Семен Илларионович, Анатолий Васильевич Аҕа дойдуну көмүскүүр Улуу сэрии бэтэрээнэ Семенов Ипатий Алексеевиһы көрүстүлэр.
Бүгүн, олунньу 7 күнүгэр, бастакы бөлөх Күүкэй, Хоро нэһилиэктэригэр отчуоту туруоруоҕа. Онтон киэһээ 18:00 чаастан Сунтаар нэһилиэгэр «Бартыһаан» КК түмүк отчуот буолуоҕа.
«Сунтаар улууһа (оройуона)» муниципальнай оройуон дьаһалтатын пресс-сулууспата.