Сунтаар улууһугар уонна чугастааҕы оройуоннарга дьиэ сыаната 30 бырыһыан аччыан сөп
Сунтаар улууһугар тутуу матырыйаалын оҥорон таһаарар урутаан сайдар сири-уоту (ТОР) тэрийиэхтэрэ. Саха сирин премьер-миниистирэ этэринэн, бырайыагы ситиһиилээхтик үлэлэттэхтэринэ, Сунтаар улууһугар уонна чугас сытар оройуоннарга дьиэ сыаната 30 бырыһыан түһүөн сөп.
“Мин өрөспүүбүлүкэ оройуоннарыгар барыларыгар сылдьар соруктаахпын. Сунтаарга бу сырыыбар бырамыысыланнас эйгэтин уратытын билистим. Дьон олоҕун-дьаһаҕын билистим”, — диэтэ Владимир Солодов.
Сунтаар оройуонугар урутаан сайдар сири-уоту тэрийэр баҕалаахтар. Премьер-миниистир Сунтаарга инвестицияны бырамыысыланнаска тардыыга улахан кыахтар баалларын бэлиэтээтэ.
“Урутаан сайдыахтаах сиргэ “Сунтарцеолит” тэрилтэҕэ анаан былаһаакканы көрдүбүт. Цеоликка олоҕуран тутуу матырыйаалын оҥоруохтара. Бу матырыйаал итиини тутар, чэпчэки уонна бөҕө-таҕа. Маассабайдык оҥоһулуннаҕына, цемент блоктары солбуйар кыахтаах. Оҥорон таһаарыы көмөтүнэн тутуу матырыйаалын сыаната аччыаҕа”, — диэн быһаарда Владимир Солодов.
Кини бырайыак тиһиктээхтик үлэлээтэҕинэ манна уонна чугастааҕы оройуоннарга дьиэ сыаната 30 бырыһыан чэпчиэҕэ диэн эрэнэр.
Салгыы бырабыыталыстыба оробуочай бөлөҕө “Кэмпэндээйитээҕи туус хампаанньата” тэрилтэ үлэтин билистэ. “Манна тууһу тоҥоруу ньыматынан хостууллар. Бу ураты уопут”, — диэтэ Владимир Солодов. Туус хампаанньата тэхиньиичэскэй тууһу эрэ буолбакка, аска туһаныллары эмиэ таһаарыаҕа. Ону тэҥэ тыынар уорган ыарыыларын сэрэтиигэ “туустаах хостору” тэрийэр бырайыактаахтар.
СИА