Бу туһунан улуустааҕы тыа хаһаайыстыбатын управлениетын начаалынньыга Иван Тихонов иһитиннэрдэ.
edersaas.ru
Сүөһү-сылгы кыстыгар улахан уустук суох диэбиттии, Иван Викторович кэпсээнин ыһыы үлэтин тэрээһиниттэн саҕалаата. Ол курдук, улуус быйыл ыһыы үлэтин 2856 гектарга (бурдугу 670, сүөһү аһылыгын 1528, хортуоппуйу 129) ыытыахтаах. Онно сөп буолар сиэмэ булуллан ууруллан турар.
Улууска 15038 сүөһү, ол иһигэр 5560 ынах баар. 900 ынах төрөөбүт. 12665 сылгы баарыттан 250 биэ төрөөбүт. Быйылгы кыстык этэҥҥэ баран иһэрин биир туоһутунан, билигин 8500 т от, 680 т сиилэс, 48 т сенаж, 275 т комбикорм саппааһа баара буолар. Сорох сылларга от тиийбэтин айдаана буолара. Быйыл улуус үрдүнэн 7500 т үүт туттарыллыахтаах, үүт харчытын 70 %-а кэлбит. Сунтаар улууһугар барыта 176 хаһаайыстыба (тэрээһииннээх хаһаайыстыбалар уонна биирдиилээн кэтэх ыаллар) үүт туттараллар.
Кыһын улуус үрдүнэн 18 бөрө бултаммытын туһунан докумуон киирбит. Ардай аһыылаахтар ордук улахан хоромньуну «Кириэстээх» хаһаайыстыбатыгар оҥорбуттар. Сүүрбэччэ сылгыны сиэбит бөрөлөртөн аҕыһа бултаммыт. Бу күннэргэ түргэнник ситэр салааны сайыннарыы бырагырааматынан Дьокуускайтан сибиинньэ оҕолоро аҕалыллыахтаахтар. Кууруссаҕа наадыйааччылар Мииринэйдэҕи көтөрү иитэр хаһаайыстыбаттан бэйэлэрэ баран ылыахтарын сөп. СӨ Бырабыыталыстыбатын отчуотугар кэлэ сылдьан, Тыа хаһаайыстыбатын миниистирэ Александр Атласов биһиги улууспут тыа хаһаайыстыбатын салаатыгар үлэтэ куһаҕана суоҕун бэлиэтээбитэ, хаһаайыстыбалар араас граннарга, бырагыраамаларга киирсэллэрин хайҕаабыта.
Билигин ханна да буоларын курдук, коронавируһу утары күүстээх үлэ ыытыллар. Үүт туттарааччылар эрэһиинэ бэрчээккилээх, мааскалаах сылдьаллар, үүтү тутар, астыыр сыахтар «Роспотребнадзор» ирдэбиллэрин толороллор. Ону тыа хаһаайыстыбатын управлениетын исписэлиистэрэ күннэтэ хонтуруолга туталлар.
Билиҥҥитэ саас кэлиитэ уонча хонугунан эрдэлээн иһэр дииллэр. Бу күннэргэ күүскэ ириэрэн, хата, хаары арыый көҕүрэттэ курдук. Ол эрээри, мантан саас халаан уутуттан сэрэхтээх буолууга болҕомто эмиэ ууруллуоҕа.
Борис Николаев, Сунтаар, «Саха сирэ» хаһыат, edersaas.ru