Аан дойдуну аймаабыт коронавирус сыстыганнаах ыарыы өрө туран, өрөспүүбүлүкэҕэ эмиэ балаһыанньа кытаатта. Ол курдук Дьокуускай, Нерюнгри, Мииринэй куораттарыгар уонна Жатай бөһүөлэгэр Ил Дархан Айсен Николаев ыйааҕынан «самоизоляция» эрэсиимэ биллэриллибитэ.
edersaas.ru
Улуустарга коронавирус утары үлэ ыытарга урбаанньыттар, уопсастыбанньыктар турунан, ким эрэ мааска тигэн түҥэтэр, волонтердар кырдьаҕастарга ас-үөл маҕаһыынтан ылан илдьэллэр.
Бүгүн Сунтаар улууһун урбаанньыттара бэйэлэрин хармааннарыттан 100-түү тыһыынча солкуобайы биэрбиттэрин туһунан иһитиннэрии батсаабынан кэллэ. Тута Сунтаар сэлиэнньэтин баһылыга Эдуард Филипповка эрийэн кэпсэтэ сылдьыбыппар:
— Кырдьык, урбаанньыттар өттүлэриттэн үтүө санаа аахсыйата ыытыллан эрэр. Аан бастаан «Главстрой комплекс» ХЭТ салайааччыта Анатолий Исаев сибээскэ тахсан, коронавирус утары үлэни ыытыыга 100 тыһыынча солкуобайы биэрэрин туһунан эппитэ. Салгыы кини холобуругар «Профстрой» СК (сал.Яковлев А.И.), «ВИД» ХЭТ (сал.Семенов Н.Н.), «Дабанстрой» ХЭТ (сал.Яковлев В.И.), «Сунтаравтодор» ХЭТ (сал. Тен С.В.) кыттыһан, 100-түү тыһыынчаны биэрдилэр. Бу үбү-харчыны кыаммат араҥаҕа, ытык кырдьаҕастарбытыгар аһынан-үөлүнэн хааччыйарга, мааска, антисептик атыылаһарга туттуохпут. Онон, түгэнинэн туһанан, харчынан көмөлөспүт урбаанньыттарга махталбын тириэрдэбин, – диэн Эдуард Егорович кэпсээтэ.
Ону таһынан, «Татыйыына» фирма ( ИП Герасимова НП ), «Корона» атыы-эргиэн ситимэ (ИП Львова НГ), «Виктория» маҕаһыын (ИП Герасимова ЕВ) аһынан-үөлүнэн көмөлөһөн, аахсыйаҕа кыттыстылар.
edersaas.ru