ХАРАҤА ХОС: Көстүбэккэ күтүрээбэтэхпит

Бөлөххө киир:

Сунтаар Куокунутугар өрдөөҕүтэ интэринээт баара. Онно, олохтоох оҕолортон эрэ буолбакка, Кириэстээхтэн, Тойбохойтон, Дьаархаантан, Бүлүүчээнтэн кэлэн үөрэнэллэрэ. Ол иһигэр биһиги, ыраах баар ферма оҕолоро, арахпат иитиллээччи буоларбыт. Олорор дьиэбит олус эргэ этэ. Сылыйан быстыбат халааҥха оһохтооҕо уонна куукунатыгар эмиэ ас буһарардааҕа быһыылааҕа. 

Дьэ, бу дьиэбит оҕо утуйан чуумпурда да, билиҥҥинэн 12 чаас диэки буолуо, тыаһаан-ууһаан киирэн барара. Мин, төрүү ыарыһах оҕо, кыайан утуйан биэрбэт этим. Суорҕаным иһигэр көлөһүн аллан, били эҥин тыастары истэр идэлээҕим.

Бастаан биһиги хоспут ыарахан аана тыастаахтык аһыллар тыаһа иһиллэрэ. Ону, суорҕаммын аһа охсон көрдөхпүнэ, аан турбутун курдук турар буолар. Онтон куукунаҕа, субу аһаары гыммыт курдук, луосканы, биилкэни наардыыр тыас иһиллэрэ. Интэринээккэ саахыматтаах, дуобаттаах этибит. Олор тохтуу-тохтуу дьоһуннаахтык хаамаллара. Дьиктитэ баар, ити тыастар солбуһаллара. Холобур, луоска тыаһыыр кэмигэр саахымат «хаампат» этэ.

Мин оронум түгэх хос аһаҕас аанын аттыгар турара. Түүн сороҕор аттыбынан атах тыаһа ааһара. Баанньа диэн уол баара. Ону: «Эн тыаһыыгын дуо?» — диирим. Улахан уолаттар түгэх хосторун хаҥас муннугуттан хараҥаҕа уот саар уҥа муннукка истиэнэни кыйа сүүрэрэ. Ону Бүөтүр Игнатьев, Томас Генеров диэн уолаттар атах таҥаһынан быраҕаллара. Онтулара, били уоттара муннугар түһэн хаалара. Мин көрдөхпүнэ, саар көҕөрүмтүйэр өҥнөөҕө.

Биирдэ саас, эмиэ үгэспинэн, ыалдьан сыппытым. Оҕолор үөрэхтэригэр тахсан, интэринээт иһэ уу-чуумпу. Бу кэмҥэ, куукуна нөҥүө, кыргыттар хосторугар оҕо сөтөллөрүн хаста да истибитим. Оччолорго маны баардыылаабат этибит. Эргэ дьиэ эмэҕэ тыаһы-ууһу иҥэринэрин билэрбит.

Интэринээппит барахсан оргуйар олоҕор үгүс кыаммат, кыһалҕалаах оҕолор иитиллэн, хараллан киһи-хара буолбуппут.

«Саха сирэ» хаһыакка, edersaas.ru саайтка анаан

Валерий Михайлов.

+1
0
+1
0
+1
0
+1
0
+1
0
+1
0
+1
0