Саха эр киһитэ тугу сатаабатаҕа баарай эрээри, быысыпкаһытын истэн баран, сөрү-диэн сөхтүм!
Бүгүн өрөбүл күҥҥэ «дьэ, сынньанар инибин…» диэн көмпүүтэртэн анаан тэйэн сырыттахпына, быйыл кыһын Кытай бэлисипиэттээх туриһын суруйарбар тылбаасчыттаабыт, Кытайга олорор «Кытай Һааска» диэн ааттыыр киһим, Сунтаартан төрүттээх ыччат уола-хаан Александр Архипов: «Убайым Илья Степанович бэйэтин быысыпкалаабыт үлэтин схематын мин Кытайга оҥорторон бэлэх гынан аҕалбытым. Саҥаһым кэриэһигэр. Билигин куоракка баар. Киниттэн интервью ылыаҥ дуо?» — диэн батсаапка суруйбут. Мин эр киһи кэргэнин быысыпкалаабыт үлэтин көрөөт, тулуйбатым, хаһаайыҥҥа эрийдим. Илья Архипов Сунтаар ыһыаҕар сылдьар эбит. Кэпсэттибит.
— Иистэммитим алта-сэттэ сыл буолла. «Иистэнии» диэн быысыпкабын ааттыыбын. Соҕотох кыыһым төрөөбүт күнүгэр боруобалаан сибэкки быысыпкалаабытым. Онтон улам ылларбыппын бэйэм да билбэккэ хаалбытым. Кэргэммин Римма Ионовнаны кэриэстээн, хаартыскатын улаатыннаран, быйыл Саҥа дьылтан саҕалаабытым. Ситэ бүтэ илик. Быраатым Һааска уол Кытайга сакаастаан, хаартысканы таҥаска түһэртэрэн ыыппыта. Кэргэним оскуола дириэктэринэн үлэлээбитэ, кэлин социальнай үлэһитинэн сылдьыбыта. Ноорунан ыалдьан, эпэрээссийэҕэ өлбүтэ. Биир кыыстаахпыт. Экэнэмиис үөрэҕэр үөрэнэр, — диэн кэпсиир Илья Степанович.
Сунтаар Хаданын олохтооҕо Илья Архипов, бэйэтэ этэринэн, норуот хаһаайыстыбатын эйгэтигэр барытыгар үлэлии сылдьыбыт. «Сүөһүгэ үлэлээбитим, сылгыһыттаабытым, бэтэринээрдээбитим, тутааччыбын даҕаны, суол үлэтигэр сылдьыбытым, кадровай булчуппун, пуобардаабытым…», — тохтоппотоҕум буоллар, өссө да идэтин барытын салгыы ааҕа туруох кэриҥнээх!
«Киһи сатаабата диэн суох. Баҕарыахха уонна ону толорууга ылсыахха эрэ наада«, — диир Илья Степанович. Кырдьык да оннук. Илья Степанович дьиэтин тээбириниттэн саҕалаан, барытын бэйэтэ оҥорор эбит. Аны быысыпкалаан киэргэтиигэ ылсан эрэр. Дьэ, маладьыас киһи!
Елена ПОТОЦКАЯ, «Саха сирэ» хаһыат, edersaas.ru