От ыйа: «Сулустар», туох кэпсээн?
Олох-дьаһах - ҮҺҮ

От ыйа: «Сулустар», туох кэпсээн?

Өрөспүүбүлүкэбит биллэр дьоно, ырыаһыттар, бэлиитиктэр үгүстэрэ “Инстаграм” социальнай ситимҥэ “олороллор”. Күннэтэ “сулустарбыт” ханна сылдьыбыттарын, тугу аһаабыттарын, атыыласпыттарын, уопсайынан, олохторугар туох буола турарын барытын билэбит. Сурах-садьык быһыытынан истибэккэ, илэ харахпытынан көрө олорорбут эмиэ даҕаны кэрэхсэбиллээх курдук.  Онон, “Инстаграмтан” быһа тардан сонуннары үллэстэбит.

Ырыаһыт Сахая уонна пародист Александр Бурнашовтар дьиэ кэргэннэригэр эбиллии буолла – уол оҕолоннулар. Бурнашовтар Ганя диэн улахан уоллаахтар, оттон кырачааннара номнуо биир ыйын ааста.

 

Ыытааччы, тамада Лиза Газизова саҥа дьиэлэннэ. Аймахтарын уонна доҕотторун ыҥыран малааһыннаата. Лиза дьиэтин мөлүйүөнтэн ордугу ­ууран, сороҕун ипотеканан ылбытын сурутааччыларыттан кистээбэккэ кэпсээтэ. 

 

Хаҥалас хотойо Егор Филиппов өбүгэлэрин сирэ төрүттэммитэ 240 сылыгар аналлаах тэрээһиҥҥэ кытынна. Манна киниэхэ Ил Түмэн Грамотатын уонна кыһыл көмүс чаһытын биэрбиттэрин туһунан “Дыгын оонньууларын” үс төгүллээх кыайыылааҕа махтанан кэпсээтэ.

 

Блогер, ырыаһыт Галина Виноград доҕотторун кытта “Анаабыр алмаастара” АХ ыҥырыытынан “Молуода”, “Майаат” уонна “Талахтаах” бириискэтигэр кэнсиэрдээн кэллэ. Хоту үлэлии сылдьар уолаттар сэргэхсийэн үөрбүттэрин туһунан страницатыгар суруйда.

 

Александр Дьячковскай – Ырыа Саарын Монголияҕа ыалдьыттаата. Дьүөгэтин Сарантуяны кытта көрсүбүт, монгуолларга саха ырыатын иһитиннэрбит. Сарантуя Олоҥхо тыйаатырын артыыһын Ырыа Саарыны хой төбөтүнэн күндүлээбит.

 

Ырыаһыт Дарья Лаврова “Үйэлээх тапталым” ырыаҕа килиип таһаарда. Бу килиипкэ тириитигэр элбэх мэҥнээх Ирина Павлуцкая кытынна.

 

Сахаттан бастакы инста-блогер Лина Малина былырыын кэргэн тахсыбыта, уол оҕоломмута. Быйыл эдэр ыал даача тутуннулар. Блогер дьиэ туттааччыларга анаан туох, ханна атыыланарын туһунан суруйан дьон махталын ылла.

 

Ализана Слепцова аан дойдутааҕы футбол чөмпүйэнээтигэр волонтерунан үлэлээтэ.  “Мин үрүҥ түүннэрим” киинэҕэ сүрүн оруолу толорбут, олоххо көхтөөх көрүүлээх кыыс күннэтэ сурутааччыларыгар санаатын суруйар.

 

Ырыаһыт Василий Сорокин “сулустартан” биир саамай көхтөөх “инстаграмщик” буолар. Балаҕан ыйын 22 күнүгэр иккис айар киэһэтин тэрийээри сылдьарын, онуоха үҥкүү бөлөҕүн хомуйарын туһунан иһитиннэрэн дьон болҕомтотун ылла.

 

Хомусчут Айсен Аммосов атырдьах ыйыгар ыал буолан эрэр. Кини сүрэҕин аҥаарынан Саргылаана диэн урбаанньыт кыыһы булбут. Эдэрдэр уруу киэһэтин тэрийээри сүүрэ-көтө сылдьаллар.

 

Биллэр урбаанньыт, Афанасий Алексеев кыыһыгар Айтаҕа оскуоланы бүтэрбитинэн, 4-5 мөл. солк. сыаналаах саҥа “Lexus” массыына бэлэхтээбитин туһунан сонун ситими толордо. «Японец» автоцентр хаһаайынын кыыһа Айта быйыл оскуолатын биир эрэ түөр­тээх бүтэрбит, салгыы Америкаҕа үөрэнэ бараары бэлэмнэнэ сылдьар.

 

Экс-миниистир Антон Сафронов Филиппиныга сылдьар. Манна олимпийскай кэмитиэти кытта көрсөн, саха тустууга Егор Дмитриев Филиппины аатыттан тустарыгар кэпсэтиини ыыта сылдьарын кэпсээтэ.

Динара Евсикова, edersaas.ru

 

3
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

4 + 16 =