Судаарыстыбаннас күнүгэр-хирурдар III сийиэстэрэ

Бөлөххө киир:

Бүгүн өрөспүүбүлүкэбит Судаарыстыбаннаһын күнүгэр Дьокуускай куоракка Мэдиссиинэ киинигэр үөрүүлээх быһыыга-майгыга хирурдар III сийиэстэрэ аһыллан үлэтин саҕалаата.

edersaas.ru, Иннокентий Александров

Тэрээһиҥҥэ өрөспүүбүлүкэбит ону кытта Москва куораттан кытары биллэр-көстөр хирурдар, мэдиссиинэ наукатын дуоктардара кытыннылар.
Сийиэһи аһар үөрүүлээх тэрээһиҥҥэ мэдиссиинэ наукатын дуоктара, профессор, мединститукка 45 сылтан тахса преподавателлээн, 8000-тан хируру үөрэтэн таһаарбыт Ахмед Романович Варфоломеев бу ый 30 күнүгэр 80 сааһын туоларынан кини үөрэнээччилэрэ атахтарыгар туран уруйдаан чиэстээтилэр.


Мэдиссиинэ аарымата Ахмед Романович: «Бастатан туран, барыгытын өрөспүүбүлүкэбит судаарыстыбаннаһын күнүнэн уонна хирурдар III сийиэстэрэ саҕаламмытынан итиитик-истиҥник эҕэрдэлиибин! 80 сааспынан эҕэрдэлээбиккитигэр улаханнык махтанабын, бу миэхэ улахан чиэс, бочуот буолар. Билигин да мэдиссиинэ институтугар преподавателлии сылдьарбыттан олус үөрэбин, астынабын.
Кырдьык, элбэх хируру үөрэтэн таһаарбытым. Олор үксүгүт бу кэлэн мин үөрүүбүн үллэстэ олороҕут. Эһиги ситиһиилэргитинэн олус диэн киэн туттабын, астынабын. Биллэн турар, үөрэтии чааһыгар кытаанах, ирдэбиллээх этим. Эһигини барыгытын таптыыбын, эһигинэн киэн туттабын.
Хирург олус наадалаах идэ. Мэдиссиинэ саамай туллар тутааҕа буолар. Куттас, сымнаҕас хараахтырдаах киһи хирург буолар анала суох. Хирург туохтан да куттаммат эр санаалаах, киэҥ көҕүстээх, ыксаллаах эпэрээссийэлэргэ сөптөөх быһаарыныыны ылынар кыахтаах буолуохтаах», — диэн санаатын эттэ.


Михаил Винокуров, СӨ хирурдар уопсастыбаларын бэрэссэдээтэлэ, мэдиссиинэ наукатын дуоктара, профессор:
— Саха сиригэр бу ыытыллан эрэр хирурдар III сийиэстэрэ биллиилээх хирург, учууталбыт, мэдиссиинэ аарымата Ахмед Варфоломеев 80 сааһыгар ананар. Ахмед Романович өрөспүүбүлүкэҕэ мэдиссиинэ сайдарыгар өҥөтө улахан. Ол курдук, кини 50-тан тахса сыл оҕо хирургиятын салайбыта. Билигин кини үөрэнээччилэрэ оҕо хирургиятын салайаллар. Ахмед Романович үлэлиир кэмигэр хирургия наука быһыытынан сайдарыгар улахан болҕомтону уурбута. Быраастар бары кэриэтэ науканан дьарыктаналларыгар суолу тэлбитэ. Түгэнинэн туһанан, Ахмед Романовиһы 80 сааһын туоларынан өрөспүүбүлүкэ хирурдарын ааттарыттан итиитик-истиҥник эҕэрдэлиибин!

* * *
Сийиэскэ Москваттан профессор, РФ Госдуматын доруобуйа харыстабылыгар кэмитиэтин бэрэссэдээтэлэ, м.н.д., профессор Дмитрий Морозов, Арассыыйатааҕы оҕо хирурдарын ассоциациятын бэрэссэдээтэлэ, профессор, м.н.д. Александр Разумовскай кэлэн кытта сылдьаллар. Хирургияҕа сыһыаннаах, саҥа ньымалар тустарынан киэҥ далааһыннаах дакылааттары аахтылар.

Иннокентий Александров, edersaas.ru

+1
0
+1
0
+1
0
+1
0
+1
0
+1
0
+1
0