Олох-дьаһах хомунаалынай хаһаайыстыба өҥөтүгэр бэриллэр субсидия сыл аҥаарыгар диэри уһатыллан биэрдэ.
Бу күннэргэ РФ тутууга уонна үлэҕэ, социальнай сайдыыга министиэристибэлэрэ кыттыгас докумуон оҥордулар. Ол чэрчитинэн, ОДьКХ өҥөлөрүн төлөбүрүгэр субсидия 2020 сыл алтынньы 1 күнүгэр диэри уһаан биэрдэ. Маннык ыйааҕы РФ бырабыыталыстыбата муус устар 2 күнүгэр бигэргэттэ.
Субсидия болдьоҕун уһатарга, алтынньы 1 күнүгэр диэри социальнай көмүскэл уорганнарыгар барар, докумуоннары илдьэр аны ирдэммэт. Ону тэҥэ, ирдэниллэр докумуон ахсаана эмиэ аҕыйаата. Бу миэрэ нэһилиэнньэҕэ коронавирус инфекцията тарҕанарын бохсор, дьоҥҥо-сэргэҕэ көмөлөһөр сыаллаах.
Хомунаалынай өҥөҕө субсидияны ыла сылдьар дьоҥҥо чэпчэтии бэйэтэ уһаан биэрэр, кинилэр тугу да гыналлара ирдэммэт. Онон маннык ыарахан кэмҥэ биир кыһалҕалара быһаарыллар.
Ангелина Васильева, “Саха сирэ” хаһыат, edersaas.ru
Хаартыска: skr.su