СУҺАЛ: Амма өрүс харыытын дэлби тэптэрдилэр
Олох-дьаһах

СУҺАЛ: Амма өрүс харыытын дэлби тэптэрдилэр

Бүгүн 15:00 чаастааҕы дааннайынан, Амма өрүс уутун таһыма 1048 сантымыатыр үрдээн, кутталлаах бэлиэни 123 сантымыатырынан аһарда. 1980 сыллаахха уу таһыма 1084 сантымыатырга тиийэ сылдьыбыт.


Амма уута үрдээһинигэр аналлаах мунньахха Дьокуускайдааҕы халлаан туругун уонна тулалыыр эйгэни кэтиир тэрилтэ салайааччытын солбуйааччы Юрий Дихтяренко Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Алексей Колодезниковка Амма өрүс туругун сырдатта. Амма өрүс уута өссө үрдээбит уонна исписэлиистэр харыыга эстэрии ыыппыттар — диэтэ.

«Харыы бэйэтэ барара халлаан сылыйарыттан тутулуктаах», — диэн Юрий Дихтяренко бэлиэтээтэ.

Бу күннэргэ Аммаҕа халлаан тымныйара күүтүллэр. Күнүс 4-9 кыраадыска диэри сылыйыа, түүн 0 кыраадыстан тымныйыа. Хаардыан сөп диэн халлаан туругун кэтээччилэр биллэрэллэр.

Амма сэлиэнньэтигэр 20 дьиэ таһа уонна 7 олорор дьиэ ууга баран тураллар. Чапчылҕан сэлиэнньэтигэр 16 дьиэ таһа ууга барда. Ууга барбыт дьиэлэртэн уопсайа 100-чэ киһи аймахтарыгар көһөрүлүннүлэр диэн Амма улууһун баһылыга Николай Архипов биллэрдэ.

Харыыга 700 киилэ дэлби тэбэр тэрили эстэрдилэр.

Амма сэлиэнньэтигэр 21 дьиэ ууга барда

Николай Попов, «Саха сирэ» хаһыат, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

20 + 3 =