Сценаҕа тахсарбыт – бэйэтэ бырааһынньык

Бөлөххө киир:

Урукку кэм дьоно үгүспүт индийскэй киинэ ырыатыгар уонна үҥкүүтүгэр уйдаран улааппыт буоллахпытына, ыраах Саха сиригэр Индия искусствотын дуораана эмиэ баар. Ол курдук, 2014 сылтан «Сыдьаайа» үҥкүү оскуолатын иһинэн «Ситара» диэн индийскэй үҥкүү бөлөҕө аһыллыбыта.

edersaas.ru

Салайааччыбыт


Анастасия Габышева-Сыдьаайа 2015 с. аан дойдутааҕы бэстибээл-куонкурус ыыппыта. Онно Индияттан сылдьар, Москва куоракка «Таран» диэн индийскэй үҥкүү тыйаатырын тэрийбит Гуру Ашвани Нигамы ыалдьыт быһыытынан ыҥырыллыбыта. Ыалдьыппыт биһиэхэ маастар-кылаас ыыппыта уонна: «Мин норуотум искусствотын сэргээн сайыннара сылдьар дьонно  сүгүрүйэбин», – диэн махтанан барбыта.

Анастасия Габышева быйыл эмиэ иккис бэстибээли тэрийэн эрэр. Салайааччыбыт: «Индия үҥкүүтүн муусуката, хас хамсаныыта, дьэрэкээн таҥаһа кэрэ анаардар уйулҕаларын, имэннэрин уһугуннарар, санааларын көтөҕөр, эттэрин-сииннэрин чэбдигирдэр», – диэн этэр. Кини бөлөҕөр эдэркээн кыргыттар ордук сэргээн, дьаныһан дьарыктаналлар.

Сыдьаайа куоракка баар бары профилакторийдарга, кырдьаҕастар дьиэлэригэр аһымал кэнсиэртэри сотору-сотору тэрийэр.

Холобур, мин култуура эйгэтигэр олох сыһыана суох, үйэбэр сценаҕа тахсан үҥкүүлээбэтэх киһибин. Ол гынан баран, хаһан эмэ үҥкүүлүүргэ үөрэниэм диэн кыра эрдэхпиттэн баҕа санаалаах этим. 30 сааспын ааһан баран , Анастасия Габышева—Сыдьаайага тиийбитим. Мас курдук хамсанарым иһин, бииргэ дьарыктанар кыргыттарым сороҕор «Буратино» диэн оонньуу-күлүү кэриэтэ күлэллэр этэ. Ити курдук дьарыктанан, сценаҕа тахсан, үҥкүү миэхэ өйбүн-санаабын сааһылыырбар көмөлөһөр. Сценаҕа тахсар бэйэтэ бырааһынньык курдук. Ол иһин, Сыдьаайаҕа махталым мунура суох. Кини, атыттарга тэҥнээтэххэ, киһини сатыыр-сатаабат диэн араарбат, кини төһө кыһалларын, үлэлиирин учуоттуур.

Сыдьаайабыт ис-киирбэх дьүһүнэ, хара, уһун суһуоҕа, номоҕон быһыыта-таһаата, киһиэхэ элэккэй сыһыана, уоттаах хараҕа биһигини тута бу кэрэ эйгэҕэ умсугуппута.

Бары араас идэлээх дьон, ыал ийэлэрэ, эбээлэрэ күннээҕи түбүкпүтүттэн сынньанабыт, араас тэрээһиннэргэ кыттабыт, өссө да элбэх үҥкүүнү үөрэтэр баҕалаахпыт.

Маргарита АРГУНОВА,«Саха сирэ» хаһыат, edersaas.ru сайтка анаан

+1
0
+1
0
+1
0
+1
0
+1
0
+1
0
+1
0