Бу күннэргэ Липецкэй куоракка 19 саастарыгар диэри уолаттар уонна кыргыттар икки ардыларыгар стендовай ытыыга Арассыыйа биирдиилээн бастыыр иһин күрэхтэһиитэ буола турар. Дойду 58 бастыҥ ытааччыларыттан бэргэн ытааччынан саха уола Николай Протопопов таҕыста. Бу Саха спордун устуоруйатыгар бастакы улахан ситиһии буолар.
Күрэхтэһиигэ урут уруккаттан кыттар Санкт-Петербурга, Москва, Липецкай, Новосибирскай, Воронежскай, Свердловскай, Ростовскай, Курганскай уобаластартан, Краснодарскай кыраайтан, Татарстантан, Удмуртияттан уонна Саха сириттэн 58 кыараҕы харахтаах кыттыбыт. Кыттааччылар “трап” диэн көрүҥҥэ 5 холонон 25-тиитэ ыппыттара.
Николай Протопопов биэстэ холонон уопсайа 110 (21+23+21+21+24) тэриэлкэни табан финалга бүтэһигинэн, алтыһынан кыттар быраабы ылбыта. Онтукайын даҕаны бэрт эрийсэн ылбыта. 111 уонна 110 тэриэлкэни таппыттар алтыа буолан хос ытыыга (перестрелка) күрэхтэспиттэрэ. Ол түмүгэр 7 очкуону ылан финалга кыттар быраабы ылбыта. Быһаарыылаах ытыы эмиэ эрбии биитинии барбыта. Түмүккэ Николай Москва уола Матвей Сергеевтыын тэҥнэспиттэрэ – 43-түү табыы. Эмиэ хос ытыы биллэриллибитэ. Бу сырыыга 20-лии тэриэлкэни ытыыга. Биһиги уолбут бииринэн элбэҕи – 19-һу табан бастакы миэстэни ылбыта. Сөҕүмэр ситиһии!
Аны саха уолаттарын “микс трап”, “скит”, “микс скит” диэн көрүҥнэр кэтэһэллэр. Күрэхтэһии бэс ыйын 28 күнүгэр түмүктэнэр.
edersaas.ru