Бэҕэһээҥҥиттэн, олунньу 26 күнүттэн, Дьокуускайга төрдүс төгүлүн ыытыллар Саха сирин успуорт кыһыҥҥы көрүҥнэрин спартакиадата “Эллэй Боотур” дыбарыаска үөрүүлээх быһыыга-майгыга арыллынна. Эрдэ биллэрин курдук, күрэхтэһиилэр икки ый кэриҥэ, муус устар бүтүөр диэри Дьокуускайга, Нерюнгрига уонна Алдаҥҥа ыытыллыахтара.
Балаһыанньа быһыытынан, Спартакиадаҕа киирбит чөмпүйэнээттэр, күрэхтэһиилэр түмүктэрэ уопсай хамаанданан түмүгү таһаарарга учуоттаныахтара. Спартакиада уопсайа аҕыс көрүҥүнэн ыытыллар: хотугу многоборье, шорт-трек, шайбалаах хоккей, хайаҕа хайыһардааһын, хайыһарынан ориентирование, сноуборд, хайыһар уонна биатлон.
Тэрийээччилэр күрэхтэһэр хамаандалары улуустарынан бөлөххө араардылар:
1 бөлөххө – Алдан, Ленскэй, Мииринэй, Нерюнгри, Ньурба улуустара уонна Дьокуускай куорат;
2 бөлөххө – Амма, Үөһээ Бүлүү, Бүлүү, Горнай, Мэҥэ Хаҥалас, Нам, Өлүөхүмэ, Сунтаар, Таатта, Уус Алдан, Хаҥалас, Чурапчы улуустара, Жатай;
3 бөлөххө – Булуҥ, Дьааҥы, Өймөкөөн, Томпо, Кэбээйи, Орто Халыма, Уус Майа, Усуйаана оройуоннара;
4 бөлөххө – Абый, Аллайыаха, Анаабыр, Үөһээ Халыма, Эдьигээн, Өлөөн, Муома, Аллараа Халыма, Эбээн Бытантай улуустара.
Альберт Трофимов, спартакиада сүрүн судьуйата:
— Успуорт кыһыҥҥы көрүҥнэрин сөбүлээччилэр түөрт сылы быһа күүппүт спартакиадалара үгэс быһыытынан ыытылларын баҕараллар бөҕө буоллаҕа дии. Урукку сыллардааҕы спартакиадалар успуорт, доҕордоһуу, сомоҕолоһуу бырааһынньыгынан, кыһыҥҥы Олимпиаданан буолан ааспыттара. Оттон быйыл, билиҥҥи балаһыанньалары учуоттаан туран, күрэхтэһии хаамыытын уларыттыбыт – олунньуттан муус устарга диэри көрүҥнэринэн үс сиринэн ыытыллар буолла. Чөмпүйэнээттэр уонна биирдиилээн көрүҥнэринэн киирсиилэр улахан таһымнаахтык ыытыллыахтара. Оонньуулар сабыллыылара Алдаҥҥа муус устар 12 күнүгэр ыытыллыаҕа.
Шорт-треккэ судьуйа Станислав Никитин:
— Күрэхтэһиилэр икки дистанцияҕа – 500 м уонна 100 м ыытыллаллар. Манна түөрт категориянан (эр дьон, дьахталлар, уолаттар, кыргыттар) мэтээллэр оонньоноллор. Уонтан тахса хамаанда күрэхтэһэр. Успуорт бу көрүҥэр ордук көхтөөхтөрүнэн Алдан, Мииринэй, Амма, Өймөкөөн, Мэҥэ Хаҥалас, Чурапчы уо.д.а. оройуоннар буоллулар.
Айтана Аммосова, edersaas.ru